Assi: Ulrik Bang

- Imminut toquttarneq akiorniarlugu inuit taama amerlatigisut katersuussimanerat takullugu uannut annertuumik attuivoq. Siunissamut neriuuteqalersippaanga, imminut toqunnissaq pinaveersaartinniarlugu ataatsimooqatigiinnissarput pisariaqarmat. Imminut toquttarnermut pissutaasartut amerlasarput assigiinngitsuusarlutillu, ilisimavarpulli atornerluiffiusumi, nakuuserfiusumi sumiginnaaffiusumilu peroriartorsimaneq inuunerup ilaani imminut toqunnissamut aarlerinaammik annertunerulersitsisartoq. Taamaattumik suliassaqarfiit akornanni anguniagaqarluta sulissutigisariaqarparput meeqqat tamarmik toqqissisimanartumik meeraanissaasa qulakkeernissaat, taama oqarpoq Naalakkersuisoq Martha Abelsen nangillunilu:

- Namminersorlutik Oqartussat kommunillu qulakkiissallugu akisussaaffigaat innuttaasut pitsaasumik peqqinnartumillu inuunissaannut pingaarnernik sinaakkuteqartoqarnissaa,  kiisalu qulakkiissallugu tapersersorneqarnissaq ikiorneqarnissarlu pisariaqartut pisortanit tunniunneqarsinnaanissaat. Kisiannili inoqatigut artorsartut malugigaangatsigit ikiuunnissamut attaviginninnissamullu tamatta periarfissaqarlutalu akisussaaffeqarpugut. Taamaattumik inuiaqatigiittut innuttaaqataasutullu ataatsimoortariaqarpugut inuunerup artornarnerani imminut toquttarneq periarfissatut imaluunniit aaqqiissutitut toqqarneqarnissaa pinaveersaartinniarlugu. Attaveqarnissamut piumassuseq tassa imminut toquttarnermik akiuiniarnermi oqariartuuterpassuit ilagaat.

Peqqissutsimut isumaginninnermullu suliassaqarfimmi suliniutitigut arlalitsigut imminut toquttarneq pinaveersaartinniarlugu suliaqartoqarpoq. 

Peqqissutsimut Naalakkersuisoqarfik Kalaallit Nunaanni imminoortarnermik nuna tamakkerlugu pinaveersaartitsinermut periusissiaq 2013-2019 naapertorlugu suliniutinik aallartisaanikuuvoq. Suliniutit immikkoortut pingasut ataanniipput: Tulleriiaarluni iliuuserisassat, ilinniarneq aamma tarnikkut peqqissutsimik siuarsaaneq.

Tulleriiaarluni iliuuserisassat
Tulleriiaarluni iliuuserisassat ersarissumik qulakkiissavaat innuttaasoq imminut toqoriarsimappat imaluunniit imminut toqunnissamut siorasaarisimappat, kikkut qanoq iliuuseqartassanersut. Tulleriiaarluni iliuuserisassani Politiit, peqqinnissaqarfik kommunillu suleqatigiinnermut ilaapput Peqqissutsimullu Naalakkersuisoqarfik iliuuseqarnissamut periarfissiissaaq. Sulineq Kommune Kujallermi aamma Qeqqata Kommuniani siuarsimasorujussuuvoq, ukiumilu nutaami kommunit sinnerini malittariiaamik iliuuseqartarnerit suliarineqassallutik. 

Ilinniarneq
Suliamik suliaqartunik kiisalu suliassaqarfimmi sulisunik ilinniartitsineq suliniutaavoq pingaarutilik. Peqqissutsimut Naalakkersuisoqarfik ukiuni arlalinni kattuffik Livslinien suleqatigalugu pikkorissarnernik neqerooruteqartarpoq. Pikkorissaaneq suliamik suliaqartunut, sulinerminni inunnik imaluunniit ilaqutariinnik imminut toqunnissamik aarlerinaateqartunik sullissisartunut siunnerfeqarpoq. Pikkorissarnermi peqataasut ilinniartarpaat imminut toqunnissamik aarlerinaat qanoq maluginiarneqarsinnaanersoq kiisalu imminut toqunnissamik siorasaarisoq qanoq oqaloqatigineqassanersoq. Pikkorissarneq maanna Isumaginninnermut Aqutsisoqarfik suleqatigalugu ingerlanneqartarpoq kiisalu anguniagaavoq pikkorissarnerup kommunini tamani neqeroorutaanissaa kiisalu ingerlaavartumik suliniutaanissaa. 

Tarnikkut peqqissutsimik siuarsaaneq
Imminut toquttarnermik pinaveersaartitsinermi atugarissaarnermik aamma tarnikkut peqqissutsimik siuarsaanermik suliaqarneq pingaaruteqartuupput. Peqqissutsimut Naalakkersuisoqarfik suleqatigalugu suliniut Tatitussuseq ineriartortinneqarnikuuvoq Kalaallillu Nunaannut tulluarsarneqarnikuulluni. Tamatuma kingorna suliniut ”ThinkInuk”-tut saqqummiuteqqinneqarpoq. Ukiup kingulliup ingerlanerani ThinkInuk Kommune Kujallermi atulersinneqarpoq kommunillu sinnerinut siaruaanneqarnissaa sulissutigineqarpoq. ”ThinkInuk”-mik  uani oqaatsimik naliginnaanerusumik atuisinnaavugut?  meeqqat inuusuttullu pakatsinermik kiisalu misigissutsinik annertuunik aqutsinissamut atortussanik piginnaasaqarnernik piviusunik tunniussinissaq, taamaasilluni meeqqat inuusuttullu akornanni atugarissaarneq siuarsarlugu.

Isumaginninnermik suliassaqarfimmittaaq imminut toqunnissamik pinaveersaartitsinermi suliniutit pingaarutillit arlallit suliniutigineqarput. 

Siunnersuinermik suliniut
Ullumikkut siunnersuinermik oqarasuaatinik sisamanik peqarpoq kiisalu sms-ikkut siunnersuinermik ataatsimik peqarluni. 1. januar 2019 aallarnerfigalugu siunnersuisarfiit Isumaginninnermik Aqutsisoqarfimmi katersuunneqassapput. Tassani oqaloqatigiinnikkut siunnersorneqarnissamut pisariaqartitsisut tamarmik saaffiginnissinnaapput. Tassunga ilaapput aamma inuit imminut toqunnissamut eqqarsaateqartartut taakkulu qanigisaat. Siunnersuisartut imminut toqunnissamik aarlerinaammik immikkut ilisarinnissinnaanissaannut piginnaanngorsarneqassapput. Siunnersuinermik oqarasuaatit sapaatip akunnerani ulluni tamani nal. 16-22 ammasassapput. Siunnersuinermik oqarasuaatit kiisalu ammasarfiit sivitsorneqarnissaat pillugit paasisitsiniaanermik aallartisaasoqassaaq.  

Imminut toquttarnermut pissutaasartut
Ilisimatusarnerup takutippaa imminut toquttarnerup kiisalu meeraanermi sumiginnagaasimanerup matuma ataani persuttagaasarsimanerup kinguaassiutitigullu kanngutsaatsuliorfigitissimanerup akornanni qanimut ataqatigiissoqartoq. Taamaattumik sumiginnaasarneq naapertuilluanngitsuliortarnerlu akiorniarlugit suliniuteqarnerit imminut toquttarneq akiorniarlugu suliniuteqarnermut pingaaruteqarlutik ilaalluinnarput. Killiliisa – Naalakkersuisut kinguaassiutitigut kanngutsaatsuliortarneq akiorniarlugu periusissiaa 2018-2022 ataatsimut isiginnilluni najukkamilu tunngaveqartumik naapertuilluanngitsuliortarnerit akiorniarlugit suliniummik tunngaviliivoq tassani najukkami unammillernartut periarfissat pisariaqartitallu ukkatarineqarlutik.


Paasissutissat sukumiinerusut pillugit Naalakkersuisoqarfimmi pisortaq Tine Pars oqarasuaammut: +299 55 75 57 imaluunniit e-mail-imut: tine@nanoq.gl attavigiuk