Aalisakkat pillugit aallakaatissiorneq
Meeqqat aalisagartorusunnissaat nerisassiornermilu peqataarusunnissaat angorusupparput. Aalisakkat kiisalu aalisakkanik nerisassianik mamarluinnartunik nerisassiorneq pillugit meeqqanut TV-kkut isiginnaagassianik tallimanik aallakaatitassiortoqarnissaa pillugu isumaqatigiissuteqaqqammersunut Peqqissutsimut Naalakkersuisoqarfimmut, Royal Greenlandimut aamma KNR-imut tamanna ataatsimut takorluugaavoq.
Assi: KNR
Aallakaatitassiani tunngavigineqarpoq atuagaq iganermut ilitsersuut AALISA – IGASA – NERISA – Meeqqat aalisakkanik iganermut ilitsersuusiaat, 2017-imi Peqqissutsimut Naalakkersuisoqarfimmit saqqummersinneqartoq. Anguniagaavoq atuakkami nerisassioriaaseq isummersuilluartoq iliuusissanillu innersuussisoq saqqummiunneqartoq tv-kkut isiginnaarneqarsinnaanngortissallugu, tassani aliikkusersuineq ilinniarnerlu ataatsimoortinneqarlutik pitsaalluinnartumillu meeqqanut isiginnaagassiarineqarlutik.
Aallakaatitassiat KNR-ip Wowow-imik aaqqissuisartui qanimut suleqatigalugit aaqqissuunneqassapput. Maria Motzfeldt meeqqat studiamut qaaqqusani peqatigalugit aallakaatitassiani ingerlatitsisuussaaq. Isiginnaartunut aalisakkat assigiinngitsut ilisaritissavaat takutillugulu aalisakkanik nerisassiat mamarnerpaat qanoq piareersarlugit ajornanngitsigalunilu nuannertigisoq. Aallakaatitat ingerlanerini isiginnaartut peqqissuseq, nerisassiorneq, aalisarneq kiisalu oqaluttuarisaaneq kulturilu aalisarnermut tunngasut pillugit paasisaqassapput.
Suliniummik illua-tungeriit aalisarneq, nunami inuussutissarsiutit pingaarnersarisaat, aamma Nerisaqarnermut Timigissarnermullu Siunnersuisoqatigiit nerisat pillugit siunnersuutaat qulit pillugit ilisimasanik annertusaaniarput. Pingaartumik aalisagartornerunissamut kiisalu nerisassiornermi meeqqat ilaatinnerunissaannut siunnersuutit pillugit.
Aalisagaq nioqqutissiaavoq pitsaalluinnartoq peqqinnartorlu, taamaattumik pissutissaqarluarpoq ullumikkumiit meeqqat iggavimmi aalisakkanik nerisassianik mamarluinnartunik nerisassioqatiginissaannut. Meeqqat aalisakkanik iganermut ilitsersuut AALISA – IGASA – NERISA, 2017-imi juullimi tunissutitut atuartunut akullernut tamanut agguaanneqartoq isumassarsiorfigisinnaavaat. Atuagaq atuakkanik atorniartarfimmi atorneqarsinnaavoq, kiisalu Peqqik.gl-imi elektroniskiusumik aaneqarsinnaalluni.
TV-kkut isiginnaagassianik taakkunannga tallimanik aallakaatitassiorneq maanna aallartinneqarpoq, 2019-illu ingerlanerani KNR-ikkut takutinneqassalluni.
Annertunerusumik paasissutissat pillugit attavigikkit:
Peqqissutsimut Naalakkersuisoqarfik: Immikkoortortami pisortaq Kirsten Fencker uunga telefon: +299 34 69 06 imaluunniit e-mail: kfen@nanoq.gl
Royal Greenland: Tuniniaanermi ingerlatsisoq Malik Hegelund Olsen uunga mobil: +299 58 57 57 imaluunniit e-mail: malo@royalgreenland.com
KNR: Radiomut pisortaq Masaana Egede uunga telefon: +299 36 15 00 imaluunniit e-mail: meg@knr.gl