Imminut toquttarneq pitsaaliorniarlugu suleqatigiittoqartariaqarpoq
”Working Together to Prevent Suicide” (Suleqatigiilluni imminut toquttarneq pitsaaliorlugu). Ulloq 10. September 2018 nunarsuarmi tamarmi nunarsuaq tamakkerlugu imminut toquttarneq akiorniarlugu ukioq manna qulequtaraa. Kalaallit Nunaanni ulloq malunnartinniarlugu assiginngitsunik aaqqissuussisoqarpoq.
- Imminut toqunneq, imminut toqoriarneq imminullu toqunnissamut siorasaarineq nunami maani ullut tamaasa pisarpoq tamattalu eqqugaasarpugut. Taamaattumillu ukioq manna ataatsimoorluta nukittunerulluta eqqaasitsissut oqariartuutaavoq qujanartoq. Ataatsimoorluta suliniutigut nukittorsarsinnaavagut. Ataatsimoorluta kisimiinngitsugut maluginerusinnaavarput,” taama oqarpoq Peqqissutsimut Ilisimatusarnermullu Naalakkersuisoq Doris Jakobsen Jensen nangillunilu:
- Pingaaruteqarpoq imminut toquttarnermut pitsaaliuineq ingerlateqqinneqarnissaa. Aamma pingaaruteqarpoq aaqqissuussinerit akornanni suleqatigiinneq nukittorsarneqarnissaa taamaasilluni pisariaqartitsisut tamarmik sumiikkaluarunilluunniit ikiorserneqarniassammata. Maanna kommunit peqatigalugit suliassaqarfiit akimorlugit suleqatigiineq nukittorsarniarparput, Tatitussuseq, ullumikkut ThinkInuk-mik taagorneqartoq Kommuni Kujallermi atuutilernikuuvoq Qeqqata Kommunianilu aallartisarneqarluni. Atuutitsilerneq kommuninut sinnerinut ukioq manna 2019-milu ingerlaannassaaq. ThinkInuk innuttaasut eqqarsaatiminni ajornartorsiuteqaleraangamik / aarlerinartorsiuleraangamik eqqarsaatitik tunngavigalugit iliuuseqannginnissaanut ikiuisarpoq, taamaattumillu imminut toqunnissamut pitsaaliuinermi suliniummut ilaavoq.
Naggataatigut oqarusuppunga nuannaralugu ukioq manna aamma ulloq malunnartinniarlugu aningaasanik tapiiffigitinnissamut qinnuteqartut amerlasimammata, tamatuma takutippaa najukkami imminut toquttarnermut pitsaaliuiniarluni annertuumik sulerusussuseqartoqartoq.”
Nunarsuaq tamakkerlugu imminut toquttarneq akiorniarlugu ulloq malunnartinniarlugu najukkami aaqqissuussinissamut ukioq manna aamma Peqqissutsimut Ilisimatusarnermullu Naalakkersuisoqarfimmut aningaasanik tapertinnissamut qinnuteqarnissamut periarfissaqarsimavoq. Peqqissutsimut Ilisimatusarnermullu Naalakkersuisoqarfik illoqarfinni nunaqarfinnilu 25-nut najukkami aaqqissuussiniartunut tapersiisimavoq.
Paasissutissat sukumiinerusut Naalakkersuisup allattaanut Rosa Thorsen oqarasuaat +299 55 33 03 imaluunniit e-mail rosat@nanoq.gl pissarsiarineqarsinnaapput.