Unammisitsineq Klasse Pujortarfiunngitsoq aallartinneqarpoq
Atuarfimmi akullerni atuartut allannissaminnut eqqarsaatiminnillu saqqummiussinissaminnut maanna piareersartussanngorput, tassa pujortarfiunngitsumik inuuneqarnissaq pillugu Peqqissutsimut Ilisimatusarnermullu Naalakkersuisoqarfiup ukioq manna unammisitsinera aallartinneqaqqammermat.
- Pujortarfiunngitsumik inuuneqarnissamut meerartavut inuusuttortavullu tapersersussavavut. Taamaattumillu pujortarfiunngitsumik inuuneqarnerup ajunngitsortaasa tamarmiusut aallunnissaat pingaaruteqarluinnarpoq. Meeqqat pujortarfiunngitsumik inuuneqarnissamik paasititsiniaanermut ilanngussassaasa takunissaat assut qilanaaraara, tamatumani pujortartuunnginnermi iluaqutissat qitiutillugit sammineqassallutik,” taama oqarpoq Peqqissutsimut Ilisimatusarnermullu Naalakkersuisoq, Doris J. Jensen.
Ukioq manna Klasse Pujortarfiunngitsoq pillugu unammisitsinermi qulequtarineqartoq tassaavoq pujortarfiunngitsumik inuuneqarnerup iluaqutissartai tamarmiusut. Atuartut qulequtaq tamanna qanoq nassuiaatigissanerlugu namminneq aalajangissavaat, taamaattorli pujortarfiunngitsumik inuuneqarneq pillugu paasititsiniaanermut siunnersuuteqarnerminni qulequtaq tamanna ilaatissavaat.
Tamatuma saniatigut klassinut unammisitsinermi peqataasussanut piumasaqaatit marluupput:
• Atuartut akornanni pujortarneq akiorniarlugu paasititsiniutinik suliaqartoqassaaq.
• Paasititsiniaanermut atatillugu klassimi qanoq eqqarsaasersortoqarnersoq, pujortarneq pillugu klassimi suna ilikkarneqarsimanersoq, paasititsiniaanermut tunngasut pillugit piffissaq qanoq sivisutigisoq klassimit atorneqarsimanersoq aammalu atuartitsissummi sorlermi paasititsiniaaneq klassimit sulissutigineqarsima-nersoq pillugu nassuiaat naatsoq ilanngullugu nassiunneqassaaq.
Klassit unammisitsinermut ulloq 14. september tikillugu ilaasussatut nalunaarsinnaapput. Pujortarfiunngitsumik inuuneqarneq pillugu paasititsiniaanissamut klassip siunnersuutinik nassitsinissaannut killiliunneqarpoq ulloq 16. november.
Meeqqat peqqinnartunik toqqaanermikkut peqqissumik inuuneqarnissamik paasisaasa annertusarneqarnerisigut pujortarnermik pitsaaliuinissaq Klasse Pujortarfiunngitsoq pillugu unammisitsinermi siunertarineqarpoq.
Unammisitsineq pillugu paasissutissat nunatsinni atuarfinnut tamanut Peqqissutsimut Ilisimatusarnermullu Naalakkersuisoqarfimmit nassiunneqarput. Unammisitsineq uani annertunerusumik paasisaqarfigineqarsinnaavoq www.peqqik.gl.
Annertunerusumik paasisaqarusukkaanni saaffigineqassaaq naalakkersuisumut allatsi Rosa Thorsen, mobil: +299 55 33 03 imaluunniit e-mail: rosat@nanoq.gl