Avannaani innuttaasunik ataatsimiisitsineq pissarsiaqarnartoq
Avinngarusimasuniittut politikerinit pulaarneqartarnissartik maqaasivaat. Peqqissutsimut Ilisimatusarnermullu Naalakkersuisup Doris J. Jensen kaammattuut tamanna tigulluarpaa. Maanna avannaani innuttaasunik arlalinnik ataatsimiisitsereerluni angalaaqqammerpoq.
Doris J. Jensen Upernavik nunaqarfiilu pulaarpai: Nuussuaq, Kullorsuaq, Aappilattoq, Naajaat, Innaarsuit, Upernavik Kujalleq, Kangersuatsiaq. Ajoraluartumik Tasiusaq aamma Nutaarmiut innuttaasunik ataatsimiisitsinissaraluit angallannikkut ajornartorsiorneq pissutigalugu unitsiinnartariaqarsimapput.
Innuttaasunik ataatsimiigiartut nalinginnaasumik amerlapput. Naalakkersuisoq Doris J. Jensen innuttaasunik ataatsimiisitsineq peqqinnissakkut unamminartut, peqqinnissaqarfiup neqeroorutai siunissamilu pilersaarutit aallarniutigai. Saqqummiinerup kingorna apeqquteqartoqarnissaanik piffissaqarluarpoq. Innuttaasut nunaqarfinnilu aqutsisut piareersarluarsimapput peqqinnissamullu tunngasunik soqutiginninnertik takutilluarpaat.
- Inoroorsaarnermut inussiarnisaarnermullu tamani naapitanni annertuumut killitsippunga. Innuttaasut peqqinnissaqarfimmi sulisunik ilinniarsimasunik amigaateqarnertik ernummatigigaat ajoraluartumik naammattoorpara. Tamanna takuneqarsinnaavoq innuttaasuni pakatsisimasuni, ilai misigipput eqqortumik suliaritissimanatik, sivisuumik suliaritinnissamut utaqqisarsimallutik suliaritereernerullu kingorna malittareqqinneqarsimanatik, taama oqarpoq Doris J. Jensen, nangillunilu:
- Pulaarninnut atatillugu isumaqarpunga peqqinnissaqarfimmi sulisut atugassarititaat misissorluarneqassasut. Nunaqarfinni amerlanerpaani peqqinnissaqarfimmi sulisunut inissaateqanngillat nunaqarfiillu tamarmiunngitsut pitsaanermik peqqissaaveqanngillat, taamatummi iliuuseqarnikkut nunaqarfinni pissutsit pitsaanerulernissaanut sulisullu ilinniarsimasut kajungilersitsisinnaagaluarmata.
Doris J. Jensen aamma peqqissaaviit pulaarpai nunaqarfinnilu peqqissaasutut sulisut ataatsimeeqatigalugit.
- Nunaqarfinni peqqissaavimmi sulisut annertoorujussuarmik akisussaaffimmik nammataqarput nunaqarfimmilu innuttaasunut pinngitsoorneqarsinnaanatik. Nunaqarfinni peqqissaavimmi sulisut ilai soraarninngungajalerput, taamaattumillu pingaaruteqartutut isigaarput suliffimmik taama pingaaruteqartigisumik tigusisinnaasunik nutaanik sulisunik ilinniartitsinissarput, taama oqarpoq Doris J. Jensen naggasiillunilu:
- Nuannaarutigaara Upernavimmi nunaqarfiinilu Pipaluk atorluarneqarmat. Neriuutigaara Pipaluk nunap sinneranut aamma taamatut piffissap ingerlanerani atorluarneqalerumaartoq.
Paasissutissat sukumiinerusut pissarsiarineqarsinnaapput naalakkersuisup allattaa Rosa Thorsen oqarasuaat: +299 55 33 03 imaluunniit e-mail: rosat@nanoq.gl aqqutigalugu.
