- Qanittumi misissuinermi paasineqartut assut pimooruppakka. Tamatuma Kræfti pillugu pilersaarutitta, 2014-imi januaarip aallaqqaataanni atuutilersup, pingaaruteqassusia uppernarsarpaa. Neriuppunga kræftip innuttaasuni peqqinnissaqarfimmilu ukkatarineqarnerunera pissutigalugu toqusartut ikiumaartut, taama oqarpoq Peqqissutsimut Ilisimatusarnermullu Naalakkersuisoq, Doris J. Jensen. 

Ilisimatusarnermit ersersinneqarpoq kræfteqalersarnerup annertuseriarnera kitaamiut inooriaasiannut ikaarsaariarnermut atassuteqartoq. Pujortartarneq, peqqinnanngitsunik nerisaqarneq imigassarlu kræfteqalersarnermut pissutaasartut ilisimaneqartut ilagaat. Tupamik atuinerujussuaq, kinguaariinni kingullerni inuiaqatigiinni siammariartorsimasoq, ilaatigut pissutigalugu taamatut ineriartortoqarnera takusinnaavarput.

- Pitsaaliuineq peqqinnerulersitsiniarnerlu kræfteqalersartut ikilisinnissaannut pingaaruteqarluinnarput. Innuttaasut peqqissuunissaannik suliniut Inuuneritta II pillugu suleqatigiinneq pitsanngorsassavarput, tamatumanilu pujortartarnerup imigassartortarnerullu pitsaaliorneqarnissaat peqqinnartunillu nerisaqarnerulernissaq ukkatarineqarpoq, taama Doris J. Jensen oqarpoq nangillunilu: 

- Kræftimik pitsaaliuinerup ukkatarineqarnerulerneratigut aatsaat kræfteqalersartut ikilisinneqarsinnaapput. Taama amerlatigisunik kræfteqalertoqarnissaa pitsaaliorneqartariaqarpoq. Assigiinngitsorpassuartigut iliuuseqarnikkut aatsaat tamanna pisinnaavoq. Tamatta immikkut akisussaaffeqarpugut. Ilaqutariit, atuarfiit, ilinniarfeqarfiit, tusagassiuuteqarfiit allallu tamarmik inuiaqatigiit ineriartornerannut sunniuteqartartut ineriartornerup ilorraap tungaanut sangunissaanut iliuuseqaqataassapput.

Ilisimatuut misissuinermik nutaamik tamatuminnga ingerlatsisut kaammattuutigaat kalaallit kræftimik nappaatillit misissorneqartarnerat, katsorsarneqartarnerat malittarinnittarnerallu sukumiisumik misissorneqassasut. Kræfti pillugu pilersaarummi kræfteqarnermut tunngasunik tamanik matussusiisumik suliniutissatut siunnersuuteqarpoq. Siusissukkut nappaammik suussusersineq, katsorsaaneq, paasissutissat, kræftinik ataasiakkaanik katsorsaaneq, piginnaanngorsaqqiineq  anniarunnaarsaanerlu pillugit siunnersuuteqarluni. 

- Ilisimatuut arlalinnik naleqquttunik kaammattuuteqarput, taakkualu amerlanersaat sulissutigineqalereersimapput. Naalakkersuisooqatigiinnissamik isumaqatigiissummi katsorsaanissamut pilersaarutit pillugit immikkoortortaqarpoq Kræftilu pillugu pilersaarut malillugu katsorsaasarnerit pitsanngorsarnissaat pimoorullugu sulissutigineqarluni. Peqqinnissaqarfitta tatineqarnera isertugaanngilaq, tamatumanngalu ersersinneqarpoq kræfti pillugu iliuuseqarneq assut pingaartinneqartoq, taama oqarpoq Doris J. Jensen

- Tamatuma saniatigut isumaqarpunga innuttaasut kræfteqarnermut siusissukkut takussutissaasut pillugu paasisaqarlutillu ilisimasaqarnissaat pingaaruteqartoq, taama oqarpoq Peqqissutsimut Ilisimatusarnermullu Naalakkersuisoq, Doris J. Jensen. 


Paasisaqarnerujumallutit attavigiuk naalakkersuisup allattaa Rosa Thorsen mobilikkut: +299 55 33 03 imaluunniit e-mailikkut: rosat@nanoq.gl