Maniitsumi Efterskoli.

-”Maniitsumiinnera nuannaarutigeqaara. Ammasumik pitsaasumillu innuttaasut uagullu politikeriusugut hashi pillugu ajornartorsiutaasut oqaloqatigiissutigilluarpavut. Misigaara hashimik atornerluineq unitsinnissaanut piumassuseqarluartoqartoq, tamannalu tunngavigaa illoqarfiup meerartai inuusuttortaalu sapinngisamik pitsaanerpaamik atugassaqartinneqarnissaanik pimoorussilluni kissaateqarneq,” taama oqarpoq Peqqissutsimut Naalakkersuisoq Agathe Fontain, nangillunilu:

-”Ajornartorsiutip aaqqinnissaanut alloriarneq siulleq tassaavoq hashi pillugu ajornartorsiuteqarnermik ammasumik oqallisigisinnaanera, tamannalu pingaaruteqaqaaq. Ataqatigiinneq ataatsimoornerlu pingaaruteqarluinnarput, hashimik atuineq pitsaaliorniarlugu ataatsimoortariaqarpugut suleqatigiittariaqarlutalu.” 

Maniitsumi hashimik atornerluineq maani nunatsinni sumiiffinni allanituulli annertuvoq. Naartusut hashimik pujortartartut amerlapput innuttaasullu amerlasuut illoqarfigisami hashimik tuniniaaneq atuinerlu annikilliuutigaat. 

Illoqarfiup pitsaaliuinermut ataatsimiititaliaata illoqarfimmi illoqarfiullu nunaqarfiini  hashi pillugu paqumisunneq unitsikkusuppaat. Ataatsimiititaliaq ajornartorsiut ukkatariniarlugu arlalinnik suliniuteqarnikuupput, ilaatigut isiginnaartitsinermut pikkorissarneq paasisitsiniaanerlu. Ataatsimiititaliaq aamma innuttaasunut nalunaartussaatitaaneq pillugu qaammarsaanikuupput, ilaatigullu tamanna isumaqarpoq hashimik tuniniaaneq pillugu politiinut nalunaartussaanermik pisussaaffeqarneq. 

Agathe Fontain unnukkut Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoq Doris J. Jensen peqatigalugu innuttaasunik ataatsimiisitsivoq. Agathep saqqummiuppaa Islandimi pitsaaliuineq pillugu angusarissaarsimanerat. Dorisip atuartitaanermut aaqqissuusseqqinneq pillugu saqqummiuppaa. 

Ilaatigut innuttaasut hashimik eqqussuinermik unitsitsiniaanerit tuniniaanermullu suliniutit pillugit apeqqutigaat, innuttaasut tassani innuttaasut hashimik tuniniaasartut sukannernerusumik pineqaatissinneqartalernissaat kissaatigaat. Oqallisigineqarputtaaq imigassamik aalakoornartortalimmik tuniniaanerup killilersorneqarnera kiisalu meeqqat unnukkut qanoq sivisutigisumik aneertassanersut amerlasuut soqutigivaattaaq. 

Innuttaasut eqimattakkaarlutik oqallisigaat sooq inuusuttut imertartut imaluunniit hashimik pujortartartut tamannalu qanoq isilluta allanngortissinnaaneripput? 

Amerlasuut oqaatigaat inersimasut meeqqanut inuusuttunullu maligassiuisuussasut pitsaasut. Angajoqqaat, ilinniartitsisut inuillu allat meeqqat inuunerisaannut annertuumik sunniuteqaqataasut akisussaaffimminnik oqariartuutillu suut ingerlateqqinneqartarnersut ilisimassavaat. Assersuutigalugu meeqqat eqqaani pujortarnerlutik. Angajoqqaatut akisussaaffik killiliisinnaanerlu inersimasunut inuusuttunullu innuttaasunik ataatsimiisitsinermi peqataasunit soqutigineqarluarpoq. 


Paasissutissat allat pissarsiarineqarsinnaapput naalakkersuisumut allatsi Nauja Møller oqarasuaat: +299 58 26 54 imaluunniit e-mail: nmoe@nanoq.gl aqqutigalugu.