Aalisagaq nioqqutissiaavoq pitsaalluinnartoq peqqinnartorlu, sapaatillu akunneranut arlaleriarluni aalisakkamik nerisarnissaq pissutissaqarluarpoq. Aalisakkanik aalisakkanillu qallersuusianik akuttunngitsumik Nerisaqarnermut Timersornermullu Siunnersuisoqatigiit nerisarnissarput innersuussutaasa qulit ilagaat. Oqariartuut pingaarutilik tamanna aalisakkanik nerisassiornermut najoqqutassap ”Aalisa – Igasa – Nerisa” siammarternissaanut peqataassaaq.

-”Nuannaarutigingaarpara meeqqat nerisassiornermut najoqqutassamik taakkununnga immikkut allanneqartumik tunisinnaagakkit. Meeqqat namminneq iggavimmukarnissaat aalisakkanillu nerisassianik mamartunik peqqinnartunillu iganissaannut kajumissaarnissaat anguniagaavoq. Nalunngilarput meeqqat nerisassiornermi peqataatinneqaraangamik nerisassanik soqutiginninnerulerlutillu usseerusunnerulersartut,” Peqqissutsimut Naalakkersuisoq, Agathe Fontain oqarpoq nangillunilu:

- ”Neriuppunga meeqqat ilaqutaasalu atuagaq tigulluassagaat atukulassagaallu. Neriuutiginarpoq atuagaq tunngavigalugu aalisakkanik nerisassanik pitsaasorpassuarnik igasoqartassasoq ilaqutariit katersuussutigisinnaasaannik mamarsaatigisinnaasaannillu. Nerisavut peqqissutsitsinnut pingaarutilerujussuupput aammali nerinermi ataatsimoorneq oqaloqatigiinnerlu pingaaruteqartorujussuuvoq. Nerisassat nerinerinnarmut tunnganngillat aammali ataatsimoornermut nuannisaqatigiinnermullu tunngapput.”

”Aalisa – Igasa – Nerisa” nerisassiornermut siunnersuutinik pitsaasunik kiisalu aalisakkat pillugit paasissutissanik iluaqutaasunik imaqarpoq. Atuagaq aalisakkanik iganermut ilitsersuuterpassuarnik mamartunik, nuna tamakkerlugu meeqqanit nassiunneqarsimasunik imaqarpoq. Iganermut ilitsersuutit peqqissaartumik nassuiarneqartunik killiffikkaartumik ilitsersuutitaqarput. Assersuutigalugu aalisakkamik boorluliat karrytallit isseqarluartut, nudlinik salati akuugaq aalisagalik nallerneqarsinnaanngitsoq imaluunniit nerisassat nutaarluinnaat pissanganarluinnartullu, Mama Ufo, misilikkit. 

Akullerni atuartumik meeraqanngikkuit, atuagarlu pissarsiarerusullugu, ernumassanngilatit. Atuagaq Peqqik.gl-imi aasinnaavat. 
Januaarip ingerlanerani atuagaq nunami tamarmi atuakkanik atorniartarfinnut nassiussuunneqassaaq, siunissamilu taamaasilluni najukkanni atuakkanik atorniartarfimmit atorsinnaalissavat.

Meeqqat aalisakkanik nerisassiornermut najoqqutassaat: ”Aalisa – Igasa – Nerisa” Peqqissutsimut Naalakkersuisumit, Agathe Fontainimit Namminersorlutik Oqartussat kantiinaanni, Nuummi unnummi kulturisiorfimmi 20. Januarimi aaqqissuussinikkut saqqummersinneqassaaq. Atuakkamiittut nerisassiat arlallit misilittarneqarsinnaassapput atuakkamillu eqquinissamut periarfissaqassaaq.

”Aalisa – Igasa – Nerisa” Peqqissutsimut Naalakkersuisoqarfimmit saqqummersinneqarpoq. Nerisassanik nuannarisalik Anne Nivíka Grødem saqqummersitsinissamut suliniummi aqutsisuuvoq. Assiliartalersuisartoq Maria Motzfeldt ilusilersuisuuvoq kiisalu Christian F. Rex atuakkap titartagartaanik kusanartunik suliaqartuulluni. 


Annertunerusumik paasisaqarusukkuit attavigiuk Naalakkersuisup allattaa Nauja Møller mobilimut: +299 58 26 54 imaluunniit e-mailimut: nmoe@nanoq.gl