Agathe Fontain Paamiuni pulaarnera
Peqqissutsimut Naalakkersuisoq, Agathe Fontain 17. januar-imiit 19. januar tungaanut Paamiunut tikeraarpoq. Agathe peqqissaavik, Imarsiornermik Ilinniarfik Utoqqaallu Illuat pulaarpaa najukkamilu pitsaaliuinermut ataatsimiititaliaq ataatsimeeqatigalugu Katersortarfimmilu Taqqissuut-ni innuttaasunik ataatsimiisitsilluni.
- ”Tikeraarninni ataatsimiinnerit arlallit pitsaapput pissanganarlutillu. Paamiut nuannersuutinniarlugu peqqinnartumillu najugaqarfiginiarlugu innuttaasunit, sulisunit politikerinillu pimoorussineq piviusoq malugalugu nuannerpoq,” Peqqissutsimut Naalakkersuisoq, Agathe Fontain oqaaseqarpoq.
Illoqarfimmi pitsaaliuinermut siunnersortimik atorfeqartoqannginnera pissutigalugu Paamiuni pitsaaliuinermut suliaqarneq unammillernarpoq. Taamaattorli illoqarfimmi ataatsimiititaliat arlaqarput pitsaaliuineq anguniarlugu suliniutit pillugit oqallillutillu aallarnisaasartut.
Ilaatigut pineqarpoq suliniut Kattunneq Mary Fonden-imiit tapersersorneqartoq. Ilaqutariit persuttaanermik eqqugaasimasunik suliaqartut suliniummi Kattunneq-mi kalaallit qimarnguimmi sulisut suliaminnut piginnaasaat nukittorsarniarlugit suliniuteqarpoq taamatuttaaq qimarnguiviup suliat akimorlugit suleqatigiinneq sulisullu allanik ilinniarsimasut suleqatigiinnerat annertusarniarpaat.
Imarsiornermik Ilinniarfimmi Agathe Fontain atoqatigiinneq peqqinnartoq pillugu inuusuttunut saqqummiivoq apeqqutinik amerlasuunik oqallilluarnermillu kinguneqartumik.
Utoqqaat Illuani inissianut nutaanut peqqinnissaqarfiup eqqaaniittussamut nuunnissamik qilanaaruteqarput. Sulisut qilanaarutaannik inissisimaffittaassaq utoqqaat illuat peqqinnissaqarfiullu suleqatigiinneranut nutaanik pitsaanernillu periarfissaqalissaaq.
Innuttaasunik ataatsimiisitsinermi Agathe Fontain Islandimimi imigassamik aalakoornartortalimmik, pujortarnermik hashimillu atornerluinermik pitsaaliueriaaseq ukkatarivaa. Meeqqat ileqqorisaat sunnerniarlugit innuttaasut amerlasuut takkuttut angajoqqaanit akisussaassuseqarneruneq inersimasunillu peqataalersitsineruneq ujartorpaat.
Innuttaasut arlallit timersorneq sammisassallu imernermut pujortarnermullu taarsiullugit pingaarutillit eqqaavaat. Amerlasuut tikkuarpaat inuusuttut peqqinnarnerusumik aalajangiisarnerannut asimukarnerulernermik imaluunniit ilaqutariit ataatsimoorlutik peqqinnartumik susassareqatigiinnerannut iluaqutaassasoq.
Paasissutissat allat naalakkersuisumut allatsi Nauja Møller oqarasuaat +299 58 26 54 imaluunniit e-mail: nmoe@nanoq.gl aqqutigalugu pineqarsinnaapput.
