Assi: Emil Nørgaard Stach

Unnuk nalliuttorsiorfiuvoq, tamatumani Peqqissutsimut Naalakkersuisoqarfik, Kalaallit Nunaanni Timersoqatigiit Kattuffiat aammalu Elitesport Greenland timersornermi peqqissutsimilu maligassiuisunut nersornaasiillutik. Nersornaasiinermi nipilersortut, qitittut isiginnaartitsisartullu akunnermiliullugit aliikkusersuisoqarpoq.

Isiginnaartitsineq KNR TV-kkut toqqaannartumik aallakaatinneqarpoq. Isiginnaagassiamik aaqqissuisut neriuutigaat isiginnaartitsineq malinnaaffigilluarneqarsimasoq aammalu nersornaaserneqartut suliniutigisimasaannit isumassarsisimassasut.

Atuarfik eqeersimaartutut toqqarneqartoq tassaavoq Saattuni Muusap Atuarfia. Muusap Atuarfiata timip atornissaa ulluinnarni atuarnermi nalinginnaasumik pisariitsumillu ilaatilersimavaa. Muusap Atuarfiani atuartut sapaatip akunneranut arlaleriarlutik qitittarput. Ingerlataq tamanna timimut iluaqutaaginnarnani aammali atuarfimmi iluarisimaarnermut ataqatigiinnermullu iluaqutaavoq.

Suliffeqarfik eqeersimaartutut toqqarneqartoq tassaavoq Mittarfeqarfiit. Mittarfeqarfiit qullersaqarfiata 2017 tamakkerlugu peqqissutsip, aalanissap ataatsimoornissallu qitiutillugit aallunneqarnissaat toqqarsimavaa. Siunertap ingerlanneqarnissaanut piffissaliisoqarlunilu nukissanik immikkoortitsiviusoq aammalu ukioq tamaat ingerlatassanut pilersaarusiortoqarluni. Suliffeqarfinni issiaannarlutik sulisut ullup suliffiusup ingerlanerani timimik qanoq atuisinnaanerannut Mittarfeqarfiit maligassiuilluarput.

Kiisalu inuiaqatigiinni eqeersimalluartumut nersornaasiisoqarpoq. Ajugaasorlu tassaavoq Marie Natuk Nielsen, taassuma timip atorluarneratigut peqqinnerulernissaq innuttaasunut ataasiakkaanut maligassiuisuuvoq. 

Marie Natuk Nielsenip sulissutaa tassaavoq peqqissutsimik siuarsaanissamik suliniut ”Aneerta”, tamatumani Qaqortumi atuartunngortussat 40-t piffissami sapaatip akunnerini 13-ini pisuttuartinneqartarlutik, naatitanik naatitsisarlutik aammalu pinngortitap ulluinnarni qanoq atorneqarsinnaaneranik ilinniartinneqarlutik. Suliniummi tunuliaqutarineqartoq tassaavoq silami sammisassaqarnerup nunatsinni siunissami atorneqarnerulernissaanik Mariep siunniussaa, taamaaliornikkut innuttaasut peqqinnerulersinniarlugit innuttaasut akornanni timip atorneqarneqarnerunissaanut kaammattuuteqarpoq. 

Ajugaasut Peqqissutsimut Naalakkersuisoqarfimmit pilluaqquneqarput. Eqeersimaartut pillugit isiginnaagassiaaqqat pingasut Peqqik.gl-imi takusinnaavatit. Tassani aamma 2018-imi timip atornerunissaa pillugu unammisitsinermi illit, suliffeqarfiit atuarfiilluunniit qanoq peqataasinnaanersoq paasisaqarfigisinnaavat.

Annertunerusumik paasisaqarusukkuit Peqqissutsimut Naalakkersuisoqarfimmi peqqissutsikkut sulianut siunnersorti, Kista Hammeken Lennert, telefon: 34 51 13 imaluunniit khle@nanoq.gl saaffigisinnaavat.