Kigutileriviit sullissinissamut sunik neqerooruteqarpat?
Nuna tamakkerlugu illoqarfinni 500 missaanniit qummut innutalinni kigutileriveqarpoq. Innuttaasut tamarmik akeqanngitsumik kigutileritissinnaapput, taamaakkaluaq meeqqat inuusuttullu 20-it inorlugit ukiullit salliunneqarput. Kigutileriviit nalinginnaasumik kigutinik misissuisarput, kigutit putuinik ilaartuisarput, kigutip mannguinik suliaqartarput, kigutit inissisimanerinik aaqqissuussisarput immikkut ittumik kigutilerisarput kigutaasiortarlutillu. Kigutilerivimmut pisortanit ingelanneqartumut saaffiginninnermi nalinginnaasumik misissortissinnavutit. Meeqqat najukkami kigutilerivimmit atuarfimmut meeqqerivimmulluunniit orninneqartarput meeqqat, sulisut angajoqqaallu eqqortumik kigutigissarnissamik/kigutit eqqiluitsuutinnissaannik ilitsersuunneqartarput.
 
Kigutigissaanermut atatillugu 20-inik ukioqalereersimasunut neqeroorutit qanoq ippat?
Kalaallit Nunaanni innuttaasut tamarmik akeqanngitsumik kigutileritissinnaapput. Tamanna aamma inersimasunut utoqqarnullu atuuppoq. Taamaammat inersimasutut utoqqartulluunniit kigutinnik ajornartorsiuteqalissaguit akeqanngitsumik kigutileritissinnaavutit. Kigutigissaanermulli atatillugu aningaasaliissutit –kigutilerisuni namminersortuni ilisimaneqartutut- inersimasut aaqqissuussamik kigutileritittarnissaannut naammanngillat. Taamaassappat sulisunut –ilaatigut kigutilerisunut ikiortinullu taamatullu atortussatigut atortorissaarutitigullu annertusaanissamut aningaasaliissutit annertunerungaatsiartariaqarput. Inersimasunik kigutigissaaneq ullumikkut neqeroorutaasoq inatsisinut atuuttunut ersiutaavoq  - atuaruk: http://lovgivning.gl/lov?rid=%7B1813B249-70D3-4738-9D72-F8B66A198398%7D
 
Kigutaasanut tunngatillugu kiffartuussineq qanoq ippa?
Sulisut immikkut ilinniarsimasut kigutaasiortuupput. Taamaammat kigutaasartaartussat utaqqisariaqartassapput? Kigutaasiortoq ukiumut ataasiarluni sumiiffinnut kigutaasiortoqanngitsunut angalasarpoq. Kigutaasiortoq nalinginnaasumik qaammat ataaseq sumiiffinniittarpoq kigutaasartaarnissamullu utaqqisutut nalunaarsukkat tunngavigalugit sulisarluni. Akuttunngitsunik najukkami kigutilerisoq kigutaasanik qupisimasunik annikitsumik iluarsagassanik suliaqartarsinnaasarpoq. Nuummi kigutigissaanermik suliallit pineqartup allamik patsiseqarluni Nuumminnera iluatsillugu kigutilerivimmilu suliassanut allanut naapertuuppat, sinerissameersut kigutaasaannik suliaqarnissamik neqeroorsinnaasarput. Kigutaasiorneq arlalinnik immikkoortortaqarpoq laboratoriamilu suliassat ilaat Danmarkimi ingerlanneqartarlutittaaq. Taamaalilluni suliaq immikkut ittuuvoq piffissartornartoq, kigutaasiuussassat amerlassusaat tunngavigalugu sumiiffinni tamani neqeroorutaasinnaanngitsoq.
Najukkani amerlanerpaani kigutigissaanermik suliallit utoqqarnik paaqqutarinnittunik suleqateqarluarnikkut, kigutaasartaarnissamik pisariaqartitsisunut attaveqarluarput.
 
Nunaqarfinni kigutigissaaneq
Kigutigissaanermik suliallit ukiut tamaasa nunaqarfinnut angalasarput – kigutilerisoq nunaqarfimmi allagarsiinikkut piffissamik inniminniinissaq assigisaallu pillugit paasissutissiisarpoq. Kigutigissuunissaq anguniarlugu suliniutissatut siunniussani maleruagassat naapertorlugit nunaqarfinnut angalanerni meeqqat mikisut tamarmik aggersarneqartarput. Meeqqat/atuartut tamarmik kigutileritittarput inersimasullu piffissaqarneq apeqqutaatillugu kigutileritinnissamik neqeroorfigineqartarlutik. Kigutileritinnerit ilaat - ass. qinnguartaanikkut assiliisoqassappat assigisaannilluunniit pisariaqartitsisoqarpat, atortorissaaruteqannginneq pissutaalluni nunaqarfinni ingerlanneqarsinnaasanngillat. Taamaattoqartillugu kigutileritittussap illoqarfiliarnissaanut piffissamik inniminniisoqartarpoq. Kigutigissaanermi suliallit nunaqarfinni peqqissaasoqarfinnik /nakorsaatinik nakkutilliisunik suleqateqarluarput, kigutilerivimmut sianernikkut pisariaqarpat nakorsaatit kigutiminnik ajornartorsiuteqartut pisariaqartitaat nakorsaasiunneqartarput, illoqarfiliarsinnaanngitsullu siunnersorneqartarput ilitsersorneqartarlutillu. Nunarfiit Kalaallit Nunaata sinnerani meeqqatut allatulli paasissutissanik pissarsisarput, taakku ataasikaanut nassiunneqartarput imal. nunaqarfinnut angalanernut atatillugu meeqqanut angajoqqaanullu tunniunneqartarlutik, taamaalillutik nunaqarfimmiut tamatumuunakkut ataatsimut isigalugit naligiissitaapput. Nunaqarfinni atuarfinni amerlasuuni fluorimik errortuineq ullormullu kigutigissartarneq suleqatigiissutaapputtaaq.
 
Kigutigissaanermi kiffartuussinerit sullissinerillu tamarmik inatsisinik atuuttunik ersersitsipput Peqqinnissaqarfiullu neqeroorutaani- sinerissami peqqinnissaqarfiup immikkoortuinut tunngatillugu nassuiaatini -allaaserineqarlutik: http://peqqik.gl/Services/Soegeresultat.aspx?sc_lang=da-DK&query=ydelseskataloget