Nakorsaaneq nutaaq siammasissumik misilittagalik
Naalakkersuisut Henrik L. Hansen-imut Nunatsinni Nakorsaanertut atorfik neqeroorutigisimavaat taannalu 1. oktober 2017 Nakorsaanertut atorfimmini aallartissaaq. Henrik L. Hansen danskit nakorsaaneqarfianni tunuliaquteqarpoq, Savalimmiuni Nakorsaanertut aammalu Danmarkimi, Savalimmiuni nunanilu assigiinngitsuni nakorsatut nakorsatut sulisimalluni.
Henrik L. Hansen Region Syddanmark-imi nakorsaanerit qullersaattut Savalimmiunilu Nakorsaanerugallartutut atorfeqareerluni sulilissaaq. Inuiaqatigiinni nakorsaaserinermi immikkut ilinniarsimavoq aammattaaq nappaatit siaruartaasiannik misissuinermik aammalu kisitsisit atorlugit nassuiaasiornermik Ph.D-tut ilisimatuunngorsimalluni. Nakkutilliinermik siammasissumik misilittagaqarpoq aammalu suliffeqarfinni politikkikkut aqunneqarlutik aaqqissuussaasuni peqqinnissakkut ilinniakkat iluanni siunnersuinermik misilittagaqarluni.
-”Henrik L. Hansen-ip Nunatsinni Nakorsaanertut atorfittaarnerani tikilluaqqunissaanut qilanaarpunga. Taama misilittagaqartigisumik qaffasissumillu ilinniarsimasumik inuttaliinerput assupilussuaq naammagisimaarpara. Uanga nammineq Naalakkersuisullu sinnerisa suleqatigiinnissatsinnut qilanaarpugut”, taama oqarpoq Peqqissutsimut Naalakkersuisoq, Agathe Fontain.
-”Atorfik qinnuteqarfigisimavara peqqinnissaqarfiup iluani ineriartortitsinerup ingerlatiinnarnissaa peqataaffigerusukkakku. Suleqatitaassama naapinnissaat qilanaaraara aammalu suliassarpassuit pissanganartut unamminartullu aallartinnissaannut qilanaarpunga,” Henrik L. Hansen oqaaseqarpoq.
Nunatsinni Nakorsaanerup pingaarnertut suliassaa tassaavoq Naalakkersuisut nakorsaaneqarfiup iluani nunatsinni nunanilu allani suleqatigisartakkat suleqatigalugit suliniutinik ineriartortitsinermi patajaatsumik aalajangiinissamut tunngavissinniarlugit.
Nunatsinni Nakorsaaneq arlalippassuarnik suliassaqarpoq matumani: innuttaasut peqqissussaat tamatumalu ineriartornera malinnaaffigissavai, pisortaqarfiit allat peqqissutsimut tunngasutigut siunnersussallugit aammalu kommunit peqqinnissaqarfiullu angerlarsimaffiutaannik nakkutilliineq kiisalu peqqinnissamik suliaqartut nakkutigissallugit.
Nunatsinni Nakorsaaneqarfiup peqqinnissamik suliaqartunut ilitsersuusiorneq aamma suliassaraa, peqqinnissamillu suliaqarnermut napparsimasut naammagittaalliuutaat suliarisarlugit kiisalu peqqissaasunut kalaallisut sulinissamut akuersissummik tunniussisartuuvoq.
Nunatsinni Nakorsaaneqarfik pillugu Nakorsaanerullu suliassaat pillugit annertunerusumik uani www.nun.gl atuarit.
Annertunerusumik paasisaqarniaruit Naalakkersuisup Allattaa Nauja Møller mobil +299 58 26 54-mut attavigisinnaavat.