Nunatsinni, minnerunngitsumillu Kommuneqarfik Sermersuumi imigassap kingunerisaanik ajornartorsiutit annertussusaat eqqarsaatigalugu kommunimi Aningaasaqarnermut Inuussutissarsiornermullu Ataatsimiititaliap tusarniaanermi isornartorsiorluni akissuteqaataa tupaallaatigeqaara.  Tunumeeqqammerpunga, angalanermilu Tasiilami Kuummiunilu innuttaasut naapipakka. Ataatsimiititaliaq assiginagu innuttaasut, innuttaasunik ataatsimiisitsinermi najuuttut, inatsisissatut siunnersuut tapersersorpaat.

Ataatsimiititaliap ilaatigut inassutigaa siunnersuummi imigassamik nittarsaassinermik inerteqquteqarneq tunuartinneqassasoq. Pingaartumik meeqqat inuusuttuaqqallu eqqarsaatigalugit nittarsaassinermik inerteqquteqarnerup pitsaaliuinermi sunniuteqarluarnera uppernarsarluarneqarsimammat siunnersuummi taannarpiaq pingaaruteqarpoq.

Misissuinernit arlalinnit nalunngilarput inuusuttuaqqat imigassamik ussassaarisoqartillugu imerniarnerusartut imaluunniit imertalereersimagaangamik annertunerusumik imerniartartut.

Isumaqarpunga ullumikkut meerartavut atornerluineq pissutigalugu naalliuttut pitsaanerusumik siunissaqartinnissaat atornerluinerullu kinguaariikkuutaanut arlalinnut ingerlateqqinneqartannginnissaa qulakkeerniarlugu sakkussat tamaasa atornissaannik pisussaaffeqartugut. Nunarsuaq tamakkerlugu Peqqinnissamik Suliniaqatigiiffik WHO innersuussivoq nittarsaassineq inerteqqutigineqassasoq, tamanna imigassamik atornerluinermik pitsaaliuinermi sakkussaagami pitsaalluinnartoq.

Ataatsimiititaliaq ilumoorpoq nunanit allanit nittarsaassinerit malittarisassiuussinnaanngikkivut. 
Isumaqarpungali tamanna pissutigiinnarlugu nunatsinni nittarsaassineq pillugu iliuuseqassanngitsugut. 

Meeqqat avatangiisini imigassamik nittarsaassinermut illersugaallutik peroriartornissamut pisinnaatitaaffeqarput. Eqqaamassavarput nittarsaassineq ataasiinnarmik siunertaqarmat – tassalu nioqqutissamik sapinngisamillu amerlanerpaanik pisititsinissaq. Tupanik ussassaarineq aamma inerteqqutigaarput, taamaattumillu paasiuminaatsippara sooq imigassamik ussassaarineq akuerissagipput.

Kikkut tamarmik takusinnaasaanni imigassamik ussassaarineq paatsuugassaanngitsumik ersersitsisarpoq imigassaq nioqqutissaatut allarpassuartulli ajoqutaanngitsoq. Imigassamik imernermut atatillugu peqqissutsikkut inooqataanikkullu ajoqutaangaartartut ussassaarutini takutinneqarneq ajorput. 

Imigassaq pillugu inatsisissatut siunnersuut nutaaq atuisumut nalinginnaasumut, imigassamik pisinissamut suli periarfissaqartumut, sunniuteqangaarnavianngilaq. Kisianni inatsit meeqqatsinnut inuusuttortatsinnullu taakkualu siunissaannut sunniuteqangaassaaq.

Politikeritut innuttaasut inuunermi pitsaasunik atugaqarnissaat akisussaaffigaarput. Taamaaliortarpugut inatsisiliornikkut. Ataatsimiititaliatut isumaqarpunga paasissutissiineq qaammarsaanerluni pitsaaliuinermi pingaaruteqartut. Kisianni paasititsiniaanerinnaq naammanngilaq. 

Paasisitsiniaaneq assiginagu inatsisiliorneq innuttaasunut tamanut sunniuteqartarpoq. Inatsisiliorneq aqqutigalugu nunaqqatitsinnut pitsaasunik sinaakkusiinissamut inuiaqatigiinnilu inooqataanikkut nikingassutit annertusiartuinnartut annikillisinnissaannut periarfissaqarluarpugut.  
Paasisaqarnerujumallutit naalakkersuisup allattaa Nauja Møller attavigiuk mobilikkut: +299 58 26 54 imaluunniit e-mailikkut: nmoe@nanoq.gl