Eqqartoruk
Frederiup ataataa eqqarsartaatsimigut napparsimalernikuuvoq. Atuarfimmi tamanna ilisimaneqanngilaq kisianni atuaqatit ilinniartitsisullu malugisinnaavaat Frederiup pissusaa allanngornikuusoq. ”Eqqartoruk”, 1. – 7. klassinut atuartitsissutaavoq nutaaq Frederimmut meeqqanullu allanut eqqarsartaatsikkut nappaat pillugu eqqarsaatinut misigissutsinullu oqaasertalersuinissamut ikiuutaasussaq.
”Eqqartoruk” Psykiatrifonden Danmark-imeersup ineriartortitaraa. Peqqissutsimut Naalakkersuisoq, Agathe Fontain Ilinniartitaanermut, Kultureqarnermut Ilisimatusarnermut Ilageeqarnermullu Naalakkersuisoq Doris Jakobsen peqatigalugu suliniut tulluarsarlugu nutserlugulu meeqqat atuarfiinut tamanut nassiunneqareerpoq.
- ”Pingaaruteqarpoq eqqarsartaatsikkut nappaatit ammasumik eqqartortassagivut, minnerunngitsumik pissutigalugu meeqqat amerlasuut inuunerminni qanimut misigisarisarmassuk. Atuartitsissutip meeqqat eqqarsaatiminnik misigissutsiminillu oqaasinnguinissaminnut ilikkarnissaannut atorneqarsinnaavoq– ilaatigullu ilaqutariinni eqqarsartaatsikkut nappaateqarneq annertuumik initusoq meeraaffigigaanni ” taama oqarpoq Peqqissutsimut Naalakkersuisoq, Agathe Fontain.
- ”Neriuutigaara atortut sananeqartut atuarfiit tigulluassagaat ilinniartitsinerminilu atorluassagaat. Atuartitsissutissat atuartunut tamanut tulluartuupput meeqqap atugarissaarnissaanut atorneqarsinnaasut. Eqqarsaatitsinnik misigisatsinnillu oqaluttuarnikkut ataatsimoornermik misigilertarpugut. Paasisarparput allat uatsitulli eqqarsarlutillu misigisartut kiisalu immitsinnut allanullu paasinninnerulersarluta”, taama oqarpoq Ilinniartitaanermut, Kultureqarnermut Ilisimatusarnermut Ilageeqarnermullu Naalakkersuisoq Doris Jakobsen.
Ilinniartitsissut ”Eqqartoruk” atuartunut 1.-7.-klassinut tulluarsagaavoq. Atortut titartakkanik, eqqartueqatigiinnissamut, kortinik, ilitsersuummillu imaqarput. Qulequtat makkuupput, eqqarsartaatsimikkut napparsimaneq, assortuunnerit, annilaanganeq, isumatsassimaneq aammalu ADHD. Atuaqatigiinni eqqarsaatit misigissutsillu eqqartornissaanut tatigeqatigiinnermik toqqissisimasumik ineriartortitsinissaq ukkatarineqarpoq, misigissutsit tunngaviusut tallimat immikkut ukkatarineqarnerullutik tassaasut nuannaarneq, kamanneq, uumissuineq, annilaanganeq nikallunganerlu.
Atuartitsissutit Psykiatrifonden-imit suliarineqarput tarnillu nakorsaanit Heidi Lindholm-imit siunnersorneqarnikkut ilusilersorneqarlutik. Atortussat atuarfinnut tamanut nassiussuunneqarnikuupput peqqik.gl-milu aaneqarsinnaallutik.
Paasisaqarnerorusukkuit naalakkersuisup allattaa Nauja Møller oqarasuaat: +299 58 26 54 imaluunniit e-mail: nmoe@nanoq.gl attavigineqarsinnaavoq.