- ”Nuannaarutigaara aamma ukioq manna Aningaasaateqarfimmut Inuunerittamut qinnuteqarnissamut annertuumik soqutiginnittoqarsimammat. Tamatuma takutippaa nunatsinni peqqinnerulernissamut suliniuteqarusuttut amerlasut. Suliniutit assigiinngikkaluaqalutik tamarmik najukkami peqqinnerulernissamut iluaqutissartaqarput,” taama oqarpoq Peqqissutsimut Naalakkersuisoq Agathe Fontain.

Suliniutit meeqqanik, inuusuttunik ilaqutariinnillu ukkassisut ukioq manna salliutinneqarput. Pingaartumik suliniutit immikkuullarissut eqqarsartaatsikkut peqqissuunermik aamma pujortartarnermik, imigassamik, hashimik naamaarnermillu kiisalu imminut toquttarnermut pitsaaliuinermik ukkassisuupput. Suliniutit Aningaasaateqarfimmit Inuunerittamit tapiissutinik pisut ilaat makkuupput:

• Suliniut TIMIGA, nakorsanngornianit peqqissaasunngornianillu ingerlanneqartoq. Suliniutip siunertaraa ilinniartut innuttaanut orniguttarnissaat, tamatumanilu innuttaasut peqqinneq, nappaatit timillu pisatai pillugit apersuisinnaapput. Aammattaaq TIMIGA paasissutissanik peqqinnarnerusumillu inooriaaseqalernissamut sakkussanik ingerlatitseqqiissaaq nappaatinillu qanoq pinaveersaartitsisinnaanissamut ilisimasanik siammarterissallutik.
 
• Sisimiuni hashimik cigaretsinillu pujortartarnermik pinaveersaartitsineq. Suliniut inuusuttunik ilinniarfeqarfinnillu soorlu Meeqqat atuarfiannik, GUX-imik aamma KTI-mik – Teknikimik Ilinniarfimmik – ukkassissaaq.

• Paamiuni ikorfartoqatigiit imminut toqunnissamik pitsaaliuinermik ukkassisut. Ikorfartoqatigiit ukioq kingulleq pilersinneqarput sapaatillu-akunneranut ataasiarlutik naapittarlutik. 

• Nunaqarfimmi Nutaarmiuni meeqqanut, ullumikkut pinnguartarfeqanngitsunut, pinnguartarfik. 

Tulliani Aningaasaateqarfimmut Inuunerittamut qinnuteqarfissaq kingulleq tassaavoq 1. april 2018. Aningaasaateqarfik Inuuneritta pillugu www.peqqik.gl-mi paasisaqarnerusinnaavutit.


Paasisaqarnerorusukkuit naalakkersuisumut allatsi Nauja Møller oqarasuaatikkut +299 58 26 54 imaluunniit e-mail nmoe@nanoq.gl attavigineqarsinnaavoq.