Innuttaasunik ataatsimiititsinermi siunertarineqarpoq Naalakkersuisup nunatsinni hashimik atornerluinerup akiorniarnissaanut suliniutit pillugit paasissutissiinissaq  aammattaarli innuttaasut isumaannik tusarniaaneruvoq qanoq ingerlasoqarneranik aammalu qanoq ilillutik politikerit pitsaanerusumik iliuuseqarsinnaanersut isumaqarfigineraat imaluunniit siunissami najukkami nunalu tamakkerlugu qanoq pilersaarusiortoqassanersoq. 

Naalakkersuisoq oqarpoq: Takkuttoqarnera assut nuannaarutigaara sammisamullu annertuumik pimoorussisoqarnera. Erseqqippoq maani illoqarfimmi nunaqarfinnilu hashimik ajornartorsiuteqarneq annertusoq. Ajornartorsiutaavoq hashi paquminartutut oqallisigeqqusaannginnera. Nutaanik atuisoqalinnginnissaa anguniarlugu pitsaaliuisariaqarpugut taamaattoqassappallu piumasaqaataavoq oqallinnermi tamatta peqataasariaqartugut pisortallu suleqatigiittariaqarlutik. 

Peqataasunit arlaqartunit ernumassutigineqarpoq hashimik tuniniaasartut inuiaqatigiinni sanngiinnerusut atornerlullugit iluaqutigisarmatigit. Erseqqissumik oqaatigineqarpoq hashi nalinginnaavallaalersimasoq ataaserlu toqqaannartumik oqarluni illoqarfimmi hashi taama annertutigisoq ataavartumik ingerlaartinneqarmat kanngunaannartoq. 

Peqataasut  ilaannit ernumassutigineqarpoq ilaasa nalaattarmassuk angajoqqaat meeqqaminnik meeqqerivimmut aallertartut uffa malunnartorsuarmik ikiaroorlutik. Siunnersuutit ilagaat atorfillit sukannersumik nalunaartussaatitaasut  atornerluisoqarneranik qanoq maluginiagaqassanerlutik takussutissaasunillu ilisarinnissinnaalernissaminut pikkorissartinneqartariaqarnerat. Ernumassutigineqarporli arlallit nalaattaramikku nalunaaruteqartoqartillugu iliuuseqartoqarpiarneq ajornermat. 

Innuttaasut aamma ujartorpaat hashimik atornerluinermik ajornartorsiuteqarnerup sakkussanik assigiinngitsunik atorneqarsinnaasunik peqalernissaq. Soorlu assersuutigalugu suliffeqarfinni nakkutilliinerit aammalu aningaasaqarnikkut  pinerlunniarnerit uppernarsiniarlugit aqunneqarsinnaanerinut uppernarsarnissaannut pitsaanerusunillu atortussanik peqalernissaq. Aammattaaq pitsaaliuinermi atortussaasinnaasut ujartorneqarput. Innuttaasut misigisimapput pisortaniit iliuuseqartoqanngippallaartoq. Annertunerusumik imaatigut angallatinik timmisartunillu nakkutiginninneq kissaatigineqarpoq. Uani immikkut ernumassutigineqarpoq nutaanik timmisartunut mittarfeqalerpat timmisartullu nunarsuarmi suminngaanniilluunnit amerlanerit illoqarfinnut toqqaannartumik attaveqalerpata.

Kiisalu annertuumik ernumassutigineqarpoq hashimik atornerluisoqarnera annertuumik akuersaarneqarnera. Hashimik niuerneq aqqusinerni ammasumik pisarpoq avatangiisillu tamanna akueriinnarpaat. Imatut toqqaannartumik oqaaseqartoqarpoq: Ilatsiinnarluta isiginnaartuuginnarsinnaanngilagut aamma isiginnaartuuginnarusunngilagut. Ataatsimoorluta Uranip naaggaarneranut assingusumik hashimut naaggaarnermik ingerlaaqatigiissinnaavugut. 

Agathe Fontain unnugu ataasinngornermi Aasiaat katersortarfiani nal. 19.00 innuttaasunik ataatsimiisitsissaaq. 

Paasissutissanik annertunerusumik pissarsiaqartoqarsinnaavoq Naalakkersuisup allattaa Nauja Møller mobil +299 582654 attavigineratigut.