Else Poulsen, tarnip pissusiinik ilisimatuutut ilinniarsimasoq Nuummilu Nuna Tamakkerlugu Ilitsersuisarfimmi aqutsisoq, Imigassaq Ikiaroornartullu pillugit Siunnersuisooqatigiinni siulittaasunngussaaq. Siulittaasup tullerilissavaa Helga Andersen Iversen, katsorsaasutut ilinniarsimasoq. Helga Nuummi Kofoed Skole-mi atorfeqarpoq. Ataatsimoorlutik siulittaasuussapput piginnaasaqarluartut atornerluineq pillugu ilisimasaqarlutik, inuiaqatigiinnilu ilaqutariinnilu inuttullu imigassamik atornerluinerup kingunerisartagaanik ilisimasaqarlutik. 

Inuk nammineq akisussaaffeqarpoq
Siunnersuisooqatigiit atornerluineq pinaveersaartitsinerlu pillugit suleqatigiinnermi Peqqissutsimut Naalakkersuisup Agathe Fontainip pingaaruteqarnerarpai toqqaanermilu Kalaallit Nunatsinni imertariaaseq naleqqutinngitsoq taakkartorlugu:  
- Qanoq imertariaaseqarnerput pillugu eqqarsartitsilerniarluta ataatsimoorluta suleqatigiissaagut. Inersimasut ataasiakkaarlutik nassuerutigisariaqarpaat piffissami sivikitsumi sukkasuumik imerpallaarnermi  kamalertarlutalu silaaruttartugut annertuumik kingunerlutsitsisinnaasumik. Tamanna nassuerutigeqqaarlugu aatsaat inuk imertariaatsimi allanngortinnissaanut periarfissaqalissaaq. Meeqqat inersimasut qanoq imertariaaseqarnersut takusarpaat, meeqqallu inersimasutut iliuuseqartarput. Inuttut ataasiakkaarluta atornerluinerup unitsinnissaanut akisussaaqataavugut.
 
Suliffeqarfiup akisussaaffia
Agathe Fontainip suliffeqarfiit tamaasa aamma kaammattorpai aanngaajaarniutit pillugit politikkeqaleqqullugit aammalu ataatsimoortariaatsimik allanngueqqullugit, taamaalilluni imigassaq ataatsimoornermi qitiujunnaarniassammat.

Kommunini tamani Allorfiit 
Kommunini tamani Allorfinnik / katsorsaavinnik pilersitsineq atornerluinermut atatillugu iliuuserineqartut annertuut ilagaat. Siulleq Qaqortumi martsip aallartinnerani ammarneqarpoq. Atornerluinermik katsorsaaviit pilersinneqarnerisigut amerlanerit katsorsartissinnaalissapput katsorsartikkusuttullu Nuummut aallartariaarutissallutik ikiorserneqarumallutillu sivisuumik Nuummiittariaqassanatik. 

Paasissutissanik allanik piniaraanni Naalakkersup Allattaa Nauja Møller oqarasuaat +299 34 66 05 / nmoe@nanoq.gl – imut imalt Peqqissutsimut Siunnersorti Lisa Christiansen oqarasuaat: +299 34 66 50 / lich@nanoq.gl –imut attavigineqarsinnaapput.