Napparsimasut ataasiakkaat katsorsartinneranni cannabis nakorsaatitut akuerineqartarpoq
Kalaallit Nunaanni perulullutik napparsimasunut cannabis nakorsaatitut ullumikkumiit kuseriaatitut iisartakkatulluunniit immikkut ittumik tunniussisinnaanermut akuersissutigineqarsinnaalersimapput.
Peqqissutsimut Naalakkersuisoq Agathe Fontain oqaluttuarpoq pingaarnerpaajusoq napparsimasup isumannaatsumiinnissaa.
”Napparsimasut ulluinnarni inuunerat pitsaanerulersittariaqarparput nakorsaatinik taamaattunik iluaqutaasinnaasunik. Taamaattumik naammagisimaarpara maanna napparsimasunut ataasiakkaanut nakorsamik akuersissuteqarnikkut illersorneqarnikkullu taamatut aaqqiissuteqarsinnaagatta”, taama oqarpoq Agathe Fontain.
Pissutsit isumannaatsut
Cannabis nakorsaat nakorsaatit pillugit inatsimmiippoq nakorsaatitullu atorneqalinnginnerani akuerineqaqqaartussaalluni. Cannabissit nakorsamit tunniunneqarsinnaasut sklerosemik nappaateqartunut anniarnaveersaatitut atorneqarsinnaapput aammalu assersuutigalugu kemoterapeertinnermi saniatigut sunniutaasunut nipaallisaaniarnermi.
Nakorsat pisortaat Anne Marie Ulrik malillugu suleriaaseq imaassaaq napparsimasoq immikkut ittumik atornissaanut qinnuteqarsinnaassasoq.
”Immikkoortortaqarfinni qinnuteqaat nakorsamit immersorneqartassaaq Dronning Ingrip Napparsimavissuani immikkoortortami nakorsaanermit suliarineqartassalluni. Innersuussinerit nakorsaatit pillugit ataatsimiititaliamut aalajangigassatut ingerlateqqinneqartassapput” taama nassuiaavoq erseqqissaatigalugulu: ”Aalajangiineq inunnut ataasiakkaanut tunngassuteqarpoq maanna nakorsaat taakkununnga iluaqutaasumik sunniuteqartoq pissutsinilu toqqissisimanartuni atorneqarsinnaasoq”.
Nakorsamit kisimi akuerineqartut tunniunneqartarput
Nunatta Nakorsaataarniarfiani napparsimasunut pitsaanerusumik nutaamik ajunnginnerusumillu neqerooruteqalernissatsinnut ikiuinissatsinnullu qilanaarpugut. Nunatta nakorsaaserisuata Inge Mortensenip erseqqissarpaa cannabis-imit nakorsaasersuineq nakorsamit atoqquneqartut kisimik akuerisaammata.
Erseqqissarpaalu ”Akuutissat inatsisinik unioqqutitsisut annertuunik sunniuteqarnerlussinnaapput. Pinngitsuuisinnaanermik, annilaanganermik ajornerusumillu ilikkariartorsinnaanermik saniatigut sunniuteqarnerlussinnaanerat anneruvoq.”
Danmark-imi aaqqiissut assipajaava
Danmark-imi Sundhedsstyrelsi ukiuni arlalinngortuni danskit nakorsaat cannabis nakorsaatitut napparsimasunut aalajangersimasunut pissutissaqarluartillugu napparsimasullu iluaqutigilluarsinnaappagu, tunniussisinnaanermik akuersissuteqarput.
Annertunerusumik paasisaqarusukkuit naalakkersuisumut allatsi mobil: +299 58 26 54 imaluunniit e-mail: nmoe@nanoq.gl attavigineqarsinnaavoq.