Issittumi tarnikkut peqqissuuneq pillugu ataatsimiinnermi Doris Jakobsen oqalugiarnermini imatut oqaaseqarpoq:

-”Issittoq akimorlugu ataatsimoorluta tarnikkut peqqissuuneq pillugu unammilligassaqarpugut ilaatigut tamanna ersersinneqarpoq imminut toquttarneq pillugu kisitsisitigut qaffasittorujussuarmik inissisimanitsigut. Unamminartut tamakku pillugit periarfissat aaqqiissutaasinnaasullu pillugit Arctic Circle Assembly-mi peqataasut peqatigalugit oqallisigineqarnerani peqataasinnaagama nuannaarutigisimaqaara”, taama oqarpoq Peqqissutsimut Naalakkersuisoq Doris Jakobsen nangillunilu:

-”Imminut toqquttarnermut patsisaasut nalileruminaapput, taamaattoq ilisimavarput peroriartorneq imigassamik atornerluinermik innarlerneqarnermillu nalaataqarfiusimappat  imminut toqunnissamik  ulorianartorsiornermik annertunerulersitsisartoq. Taamaattumik nukippassuit atorlugit imigassamik ikiaroornartumillu atornerluilinnginnissaq pinngitsoortinniarlugit suliniuteqarpugut ilaqutariinnut aserorsaataammata. Ajortut naaffeqanngitsut kipitinniarpagut ilaqutariillu atugarissaarnissaat oqaluuserisassanut ilanngunniarparput.”

Doris Jakobsenip Islandimiinnermini islandimi katsorsaanermi qitiusoqarfik pulaarniarpaa tassanilu imigassamik ikiaroornartumillu atornerluisunik katsorsaanerit annerusumik suliarineqartarput kiisalu katsorsartinnissamut assigiinngitsut  neqeroorutigineqartarput  atornerluisut assigiingitsut pissuserisaannut naleqqussagaasarluni.

Island-imi atornerluisunik katsorsaanermi kajumilersitsineq katsorsartittullu pissuserisaat malillugit katsorsaasarneq tunngaveqartillugu  ingerlanneqartarpoq. Periutsit taakkua Kalaallit Nunaannit atornerluisunik katsorsaanermi neqeroorummi januar 2016 Allorfiup pilersinneqarneratigut atuutilersumi aamma atorneqarput.

Sukumiinnerusumik paasisaqarusukkaanni naalakkersuisup allattaa Rosa Thorsen attavigineqarsinnaavoq mobil + 299+55 33 03 imaluunnit e-mail: rosat@nanoq.gl