- ”Nerisassat ukiuanni nerisaqarnermut 10 innersuutit pingaartippagut. Innersuutit ilaata imermik imernissaq siunnersuutigaa. Tassanilu ersarippoq: imermik imerit –saftimik sodavandimillu annikinnerusumik imertarit,” taama oqarpoq Peqqissutsimut Naalakkersuisoq Doris Jakobsen nangillunilu:

-”meeqqat minnerni atuartut tamarmik atualernerminni imermik imertarfissaminnik tunineqassapput. Neriuppunga meeqqat imertarfittaatik nuannaarutigissagaat aaliangersimasumillu atuagaasivimmiorisassagaat. Nerisaqarnermut Timigissarnermullu Siunnersuisoqatigiit innersuutigaat kuunninngaanniit kuuffinninngaaanniillu imeq nillaarissoq imerluartassagipput Ilaannikkuinnarlu safti sodavandillu imertassagivut. Oqariartuut tamanna meeqqanut angajoqqaanullu siammaakkusupparput.”  

Innuttaasunik misissuinerup kingulliup takutippaatigut inersimasut pingajuarterutaat ullut tamaasa saftimik sodavandimillu imertartut. Meeqqat akornanni malunnartumik sodavandimik sukkulimmik imertartut 2010-imi 34%-imiik 2014-imi 14% appariarsimapput. Misissuinermili meeqqat apersorneqarsimanngillat saftimik tungusunnittumik imaluunniit imeruersaatinik annertuumik sukkulinnik imertarnersut.

2016 inuit peqqissuunissaannut programmimi Inuuneritta II-mi tassaavoq nerisaqarnerup ukiua. Nerisavut imertakkavullu peqqissutitsinnut inuulluarnissatsinnullu sunniutilerujussuupput, ileqqullu peqqinnartut meeraanermi ilusilerluarneqarnerpaasarput. Qulequttami “Meeqqat nerisassallu” ukiup ingerlanerani nerisaqarnerput assigiinngitsutigut immikkut sammineqassaaq ilaqutariinnut sammitillugit toqqaannartumillu meeqqanut tunngatillugit.

Inuuneritta II nerisaqarnermullu anguniakkat www.peqqik.gl –imi atuakkit. Uani atuaruk.

Annerusumik paasissutissanik naalakkersuisup allattaa Rosa Thorsen pissarsiffigineqarsinnaavoq mobil: +299 55 33 03 imaluunniit e-mail: rosat@nanoq.gl aqqutigalugit