-”Meeqqanut festivalimik pissanganavissuliortoqarsimavoq nerisasserineq peqqinnerlu aallaavigalugit. Nerisaqarnermut innersuussut pingaarnerpaaq tassa allanngorartunik nerisarnissaq. Taamaammat nerisassat peqqinnerlu pillugit meeqqat alapernaannerat annerulersikkusupparput. Piumalersikkusuppavut nangaanatik nerisassat assigiinngitsut usserniassammatigit”, oqarpoq Peqqissutsimut Naalakkersuisoq, Doris Jakobsen nangipporlu:

-”Mamartut Festival aqqutigalugu meeqqat periarfissaqarput nerisassat peqqinnartut ilikkarnissaannut sammisat nuannersut aqqutigalugit. Meeqqat nunatsinni inuussutissaatigut paasisaqarfigissavaat minnerunngitsumik aalisakkat. Aalisakkat peqqinnartorsuupput, inuiaqatigiinnullu siunnersuut tassaavoq sapinngisamik aalisagartukulanissaq.”

Mamartut Festival Innuttaasut peqqissuunissaannik suliniutip Inuuneritta II-p ilagaa nerisaqarnerup ukiuanik ersersitsisoq, qulequtaqartinneqartoq ”Meeqqat nerisassallu”. Festivalip anguniagaraa aaqqissuussamik pilersitsinissaq ukiut tamaasa uteqqiattussamik nuna tamakkerlugu ingerlanneqartartussamik.

Massakkorpiaq Peqqissutsimut Naalakkersuisoqarfimmit nuummi meeqqanut kajumissaarutaavoq: ”Qaallusi ilisimasaqaleritsi nerisartakkasi pillugit, nutaanik misilitaqarlusi ilaquttat kammalaatillu ilagalugit nuannisarlusi.”

Mamartut Festival pillugu annerusumik Peqqik.gl aqqutigalugu paasisaqarit imaluunniit festival malinnaavigiuk uani: Facebook/mamartutfestival

Annerusumik paasissutissanik pinialuni attavigineqarsinnaavoq naalakkersuisup allattaa Rosa Thorsen mobilikkut: +299 55 33 03 imaluunniit e-mail: rosat@nanoq.gl aqqutigalugu.