Ataatsimut hashi akiorniarlugu
Peqqissutsimut Naalakkersuisoq, Doris Jakobsen Ilaqutariinnermut Peqqissutsimullu ataatsimiititaliaq Qaqortumi Narsamilu innuttaasunik ataatsimiisitseqatigiipput. Pingaarnertut hashi pillugu ajornartorsiutit oqallisigineqarnissaat anguniarneqarsimavoq minnerunngitsumillu nunap immikkoortuani unammilligassat imaannaanngitsut hashimik ajornartorsiuteqarneq anigorniarnissaanut kujataani innuttaasunit oqaaseqaatinik naleqarluartunik pissarsinissaq siunertaasimavoq.
Kalaallit Nunaanni Hashimik atornerluineq annertuvoq minnerunngitsumillu kujataani annertoorujussuarmik ajornartorsiutaavoq. Innuttaasunik misissuisitsinermi 2014-imeersup ersersippaa angutit inuusuttut 31%-ii 18-it – 24-illu akornanni ukiullit akulikitsumik atuisartut (minnerpaamik qaammammut ataasiarlutik).
Innuttaasunik misissuinerup aamma ersersippaa kujataani hashimik pujortartarneq annertoorujussuarmik atorneqartartoq tassa innuttaasut 18,5 % akulikitsumik hashimik pujortartarlutik. Tamanna immikkuullarissumik qaffasinneruvoq nunap sinneranut sanilliullugu tassani angutit 16%-ii arnallu 9%-ii atuisuullutik.
Tamannalu peqqisutsimut Naalakkersuisup, Doris Jakobsenip annertuumik isumannartoqartippaa:
”Hashi pillugu ajornartorsiut massakkorpiaq aalajangiusimanngikkutsigu kinguaariit tulliuttut annertuut annaassavavut. Taamaammat Inatsisartut Ilaqutariinnermut Peqqissutsimullu ataatsimiititaliaat annerusumik suleqatiginiarpavut ajornartorsiutit qaangerniarlugit. Hashimik atornerluineq ataatsimut akiorniarparput pinaveersimatinniarlugulu”, oqarpoq Doris Jakobsen.
Kujataani ajornartorsiut pingaartillugu suleqatigiinnerullu annertusineranut atatillugu Peqqissutsimut Naalakkersuisoq Ilaqutariinnermut Peqqissutsimullu ataatsimiisitaliap sinniisaanik kujataanut angalaqateqarsimavoq. Illoqarfinni innuttaasunik ataatsimiisitsinerit augustimi innuttaasut ornigarluarsimavaat apeqqarissaarnerillu innuttaasut soqutiginninnerannik ersersitsisimavoq ajornartorsiummik aniguiniarnissaq eqqarsaatigalugu.
Ataatsimiititaliap Naalakkersuisullu Doris Jakobsenip innuttaasorpassuit ataatsimeeqataasimasut oqallinnermullu ilanngusseqataasimasorpassuit qutsavigaat.
”Ataatsimiititaliap Peqqissutsimut Naalakkersuisumik suleqateqarneq nuannaarutigaat. Innuttaasorpassuit ataatsimiigiarnerat oqallinnermilu peqaataalluarsimanerat nuannaarutissaavortaaq, taamaasilluta ataatsimoorluta hashimik atornerluinerup pinaveersaartissinnaagatsigu taama naqissusiivoq Ineqi Kielsen (S), Ilaqutariinnermut Peqqisutsimullu ataasimiititaliami ilaasortaq.
Kiisalu Doris Jakobsenip Campus Kujalleq Qaqortumiittoq pulaarpaa inuusuttunillu hashimik ajornartorsiorneq sammillugu. Tassanilu soqutiginninneq aamma annertuvoq inuusuttullu isumassarsianik pitsaalluinnartunik tunniussaqarput hashimik atornerluineq pinaveersimatinniarlugu.
Angalaqataasut aamma Qaqortumi Narsamilu peqqissaaviit kigutit nakorsaqarfiillu ilanngullugit pulaarpaat.
Annerusumik paasisstissanik piniarfingineqarsinnaavoq naalakkersuisup allattaa Rosa Thorsen mobilikkut: +299 55 33 03 imaluunniit e-mail: rosat@nanoq.g atorlugu.