Oqalliffik Immikkut – Ikiaroornartumik hashimik atornerluineq
KNR Oqalliffik immikkut aallakaatitsilluni naalaartartunik peqatiserinnippoq, oqallinneq Peqqissutsimut Naalakkersuisoqarfik peqatigalugu aaqqissuunneqarluni.
Ikiaroornartumik hashimik atornerluineq Katuap inersuaaraani pingasunngorpat maajip aqqarnani unnukkut nal. arfineq-marluniit qulingiluat tungaannut oqallisigineqassaaq.
Assi: Ulrik Bang
Inunnik sullissisut politikerillu oqallisissapput aammali innuttaasut isummaminnik saqqummiinissamut apeqquteqarnissamullu periarfissaqarput.
Inunnik sullissisut Kommuneqarfik Sermersuup suliffissarsiuussisarfianiit aamma inunnik isumaginninnermik immikkoortortamiit, Politiinit, Ilinniartunik Siunnersuisarfimmit kiisalu Meeqqat Illersuisuat, ikiaroornartumik atornerluinerup kingunerisaanik sulinerminni unammillernartitatik pillugit saqqummiissapput.
Naalakkersuisunut ilaasortat marluk aamma Inuit Ataqatigiinnit Partii Naleqqamiillu peqataasut politikkimik oqallisissapput.
Oqallinneq toqqaannartumik radiokkut aallakaatinneqassaaq, nittartagarlu knr.gl aqqutigalugu tusarnaarneqarsinnaalluni.
Oqallinneq Katuami najuuttunut kalaallisuumiit danskisuunngortinneqassaaq.
Ikiaroornartumik hashimik atornerluineq pillugu oqallinneq sisamanngornermi maajip aqqaneq-aappaanni Oqalliffiup nalinginnaasumik (toqqaannartumik) aallakaatinnerani nanginneqassaaq. Peqqissutsimut Naalakkersuisoq Doris Jakobsen studiami pulaartoralugu, naalaartartut inuiaqatigiinni ikiaroornartumik hashimik atornerluinerup qanoq qaangerneqarsinnaaneranik isummersorsinnaapput namminerlu atornerluinermik qaangiiniarnermi iliuuserisimasatik saqqummiussinnaassallugit.
Apeqqutissaqaruit KNR Radiomi pisortaq Masaana Egede sianerfigisinnaavat tlf. 36 15 00 imal. mailimut meg@knr.gl.