Nunani avannarlerni psykiatri pillugu suleqatigiinneq Kalaallit Nunaannut pingaaruteqarpoq
Peqqissutsimut aammalu Nunanik Avannarlernik Suleqateqarnermut Naalakkersuisoq Doris Jakobsen pingasunngornermi 27. april finlandip siulittaasoqarfianit aaqqissuussamit Nunani avannarlerni Isumaginninnermik Peqqissutsimullu ministerit ataatsimiinneranni peqataavoq.
Assi: Peqqissutsimut Naalakkersuisoqarfik
Ataatsimiinnerup nalaani Doris Jakobsen erseqqissarpaa nunani avannarlerni psykiatri pillugu suleqatigiilernissaq qilanaaralugu.
-Nunani avannarlerni ilisimasanik misilittakkanillu avitseqatigiiffiusussaq suliniutissanillu aalajangersimasunik pitsanngorsaaviusussaq nunani avannarlerni atorfilittanit maanna aallarnisarneqarpoq. Inuit suleqatigiittussat sammisat arfineq marluugallartut toqqarpaat tassani immikkut ittumik pisariaqartitsinikkut ilisimasanik misilittakkanillu avitseqatigiissinnaallutik, taama oqarpoq Peqqissutsimut Nunanillu Avannarlernik Suleqateqarnermut Naalakkersuisoq.
- Sammisat arfineq marluk Kalaallit Nunatsinni pitsanngorsaavigineqarnissaannik pisariaqartipparputtaaq, Doris Jakobsen erseqqissaavoq.
Sammisat arfineq marluk ukuupput, toqusoqarpallaartarneq tarnimikkullu napparsimasut akornanni imminortarnerit, psykiatrimi pinngitsaaliineq pissaanermillu atuineq, psykiatri pillugu ilisimatusarneq, inuit tarnimikkut napparsimaatigalutik atornerluisunik unamminiagallit, tarnikkut nappaatilittut eqqartuussat, Telepsykiatri, innuttaasunik akuutitsineq namminerlu aalangiisinnaassuseqarneq. Taakkua saniatigut nunani avannarlerni atorfillit eqimattat eqqarsartaatsikkut peqqissuunerulernissaq pillugu suliaqassapput.
Ullormi ataatsimiiffimmi Doris Jakobsen aamma salliutippaa nunani avannarlerni atorfinititsinermi paasissutissanik avitseqatigiinneq nakkutilliinermillu suliaqarneq tapersersorneqarnissaa.
Paasissutissanik allanik piniaraanni naalakkersuisup allattaa Rosa Thorsen mobil +299 55 33 03 / rosat@nanoq.gl attavigineqarsinnaavoq.