-” Politiit, kommunit imaluunniit peqqinnissaqarfiup kisimiillutik imminortarnermik ajornartorsiut aaqqiivigisinnaanngilaat. Tamannalu innuttaasut peqqinnissaat pillugu ataatsimeersuarnermi oktobarimi pisumi saqqummiunneqarpoq, tassani paasinarsivoq susassaqarfiit akimorlugit qanimut suleqatigiinnissaq pisariaqartinneqartoq imminortarnerit imminoriartarnerillu appartinneqassappata,” oqarpoq Peqqinnissamut pisortaagallartoq Lone Nukaaraq Møller nangillunilu:

-”Aamma maluginiarparput pisariaqartinneqarmat peqatigiilluta suleqatigiissutigisariaqarivut akisussaaffiit ersarissarnissaat imminortarnerup pinaveersaartinneqarnissaani, uanilu qitiusumik pinaveersaartitsinermi ataatsimiititaliamik pilersitsisariaqarluta  peqqinnissaqarfik, kommunit politiillu ilaasortaatitaqartillugit.”

Nuna tamakkerlugu imminortarnermik pinaveersaartitsinermi periusissiami ersippoq imminornissamik uloriaqartorsiortunut qimagaasunullu ataqatigiissumik neqerooruteqar-nissaq. Periusissaq eqqarsaatigalugu Peqqissutsimut Naalakkersuisoqarfiup sulissutigaa sumiiffinni neqerooruteqarnissaq imminornissamik eqqarsaateqartunut. Tamanna pissaaq ASIST-p siammarterneratigut, taanna tassaavoq nunarsuaq tamakkerlugu nersugaasoq sulisunut ilinniagalinnut aammalu innuttaasunut  pikkorissaasarneq imminornissamik ulorianartorsiortunut ikiueqqaarnissamut.

Uani atuaruk: Imminnut toqunnissamut pinaveersaartitsiniarluni ikiueqqaarneq

Aammattaaq annertuumik pisariaqartinneqarpoq neqeroorut imminortoqarsimatillugu qimagaasunut inunnullu imminornissamik eqqarsaateqartunut. Kommunit ilaanni neqeroorutigineqartarpoq ikiuineq allanilu peqqinnissaqarfiup neqeroorut taamaattoq tigummisarlugu, ullumikkut sumiiffiit ilaanni aalajangersimasumik neqerooruteqanngilaq. Taamaammat qimagaasimasunut aalajangersimasumik neqerooruteqartarnissaq pisariaqartinneqarpoq.

Peqqinnissaqarfiup  imminoriarsimasut pingaarnertut aallutarisarisarpai sullittaramikkik. Tarniluttunut immikkoortortaqarfik innersuussinikkut imminoriarsimasunut nakkutilliinermik tarnillu nakorsaanik arfineq pingasoriarluni oqaloqateqarnissamik neqerooruteqartarpoq. Nuup avataani illoqarfinnut nunaqarfinnullu neqeroorut aamma periarfissaalernikuuvoq ungasianit tarnikkut katsorsaanerup atuilerneragut. Neqeroorut assut soqutigineqarpoq taamaasillunilu tarnip nakorsaanik pisariaqartitsinerup alliartornera tassuuna takuneqarsinnaalluni.

Ilisimatusarnerup takutippaa atornerluinermi nakuuserfigineqarnermilu alliartorsimagaanni imminornissamut uloriarnartorsiorneq qaffattartoq aammalu imminoriarnissaq qaninnerulersartoq, taamaammat imminornissamik pinaveersaartitsinermi atornerluinermik, nakuusernermik kinguaassiutitigullu pinngitsaaliinermik pinaveersaartitsineq ilaalluinnarpoq.
 

Annerusumik paasissutissanik piniarfigineqarsinnaavoq pisortaagallartoq Lone Nukaaraq Møller oqarasuaat +299 34 66 25 imaluunniit e-mail lnmo@nanoq.gl