Meeqqat pinnguarlutillu timiminnik atuisussaapput – sisorarlutik, sikkilerlutik arpallutillu. Kalaallit Nunaannili meerarpassuit taamaaliorneq ajorput. Nalunaaquttap akunnerpassui issiaannartarput, immaqa kammalaatitik arsaattarfimmi arpaqattaaqatiginissaraluannut imaluunniit sisorartarfimmi sisoraqatiginissaraluannut taarsiullugu qarasaasiarlutik.

Meeqqat 21 %-iinnaasa akissutaasa takutippaat Inuussutissat Timigissartarnerlu pillugit Siunnersuisoqatigiit ullut tamaasa minnerpaamik nalunaaquttap akunnerani ataatsimi timimik atuisarnissaq pillugu inassuteqaataat malittarlugu. Niviarsiaqqat 15-17-inik ukiullit akornanni suli tamanna ajorneruvoq. Taakku 8 %-iinnaasa oqaatigaat ullut tamaasa ullormut nalunaaquttap akunnerani ataasimi timiminnik atuisarlutik.

Meeqqalli atuartut timimik atuisarneq pillugu aperineqarmata assersuutigalugu pisunneq akissutissanut ilaanngimmat ilimagineqarpoq amerlanerit pisortatigoortumik inassuteqaatinik malinnittartut.

WHO-p inassutai assigiinngissitaarnerusut malillugit meeqqat 5-it 17-illu akornanni ukiullit ullut tamaasa minnerpaamik nalunaaquttap akunnerani ataatsimi timiminnik atueqquneqarput - naammaannartumiit tamaviaavittarnissaq tassani aamma pineqarput. Tassa sammisat timersornerillu ilinnut anertikkartitsisussat tassani eqqarsaatigineqar¬put. Aamma pingaaruteqarpoq meeqqat nukimminnik saanerminnillu nukittorsaaniarlutik sapaatip akunneranut minnerpaamik pingasoriarlutik tillernerminnik qaffatsitsisarnissaat (imminnut qasutittarnissaat) imminnullu kiagutsittarnissaat. Eqqissilluni pisuttuarneq naammanngilaq, naak tamanna susoqannginneranik ajunnginnerugaluartoq.

Peqqissutsimut Naalakkersuisup Doris Jakobsenip taamaattoqarnera ernumassutigaa, inuillu meeqqanut tunngasutigut suliaqartut tamaasa meeqqat timiminnik atuinissamut piumassuseqalernissaannut ikiuunnissaannik kajumissaarlugit:

- ”Nalunngilarput timimik atuineq peqqissutsitsinnut pitsaasumillu inuuneqarnissatsinnut pingaaruteqarluinnartoq. Meeqqat atuartut timiminnik atuisartut atuarfimmi angusarissaarnerusarput meeqqanullu timiminnik atuineq ajortunut sanilliullutik inuunerinnerusarlutik. Anguniagaraarput meeqqat inuusuttullu 18-it inorlugit ukiullit tamarmik skiima malillugu nalunaaquttap akunnerani timiminnik atuisarnissaat”.

Qanittukkut Peqqissutsimut Naalakkersuisoqarfiup timimik atuisarnerup siuarsarneqarnissaanut qanoq iliorsinnaanermut isumassarsiorfik saqqummiuppaa, tassani ilaatigut atuarfimmi pisortat ilinniartitsisullu atuarfimmi timimik atuinerunissamut ”siunnersuutit periuserineqarsinnaasullu” nassaarfigisinnaavaat. Assersuutigalugu timimik atuisarneq ilinniartitsinermut ilanngunneqarsinnaavoq, imaluunniit atuarfimmi kikkut tamarmik ulloq aallarnerlugu pisuttuartarsinnaapput arpallutilluunniit.

Paasissutissanik allanik pissarsiniaruit attavigiuk Peqqissutsimut Naalakkersuisoq Doris Jakobsen allattaa Rosa Thorsen aqqutigalugu, oqarasuaat +299 55 33 03 sianerfigalugu imaluunniit e-mail rosat@nanoq.gl allaffigalugu