Peqinnissaqarfik pillugu oqaluttuaq eqqunngitsoq ataasinngornermi aggustip ulluisa 24-anni Nuuk TV-mi saqqummiunneqarpoq.  Peqqinnissaqarfimmi akisussaassuseqarluta qullersaasugut pisuutitsinerit akuerineqarsinnaanngitsut oqaaseqarfiginngitsoorsin-naanngilagut.

Tunngavissaqarani pisuutitsineq
Nunatsinni nakorsanit, peqqissaasunit sundhedsassitentinillu nakorsarneqarnerup kingorna inuit arlaqartut toqusimasut, ilanngussami tusagassiortoq oqarpoq imalu nang-illuni ”napparsimasut toqusarnerat nalinginnaavoq”. Oqaaseqaat taama sakkortutigisoq  tunngavissaqarani saqqummiunneqarpoq.

Ilanngussami oqaatigineqartutut napparsimasut ataasiakkaat maalaarutaasa, peqqin-nissakkut sullissisut sakkortuumik isornartorsiorneqarnerannik kingunillit, isumaqatigineqarsimanerat ilumoorpoq.

Ikittuinnaapput
Nakorsaqarneq pillugu inatsisip unioqqutinneqarnera tamatigut imaannaanngitsuuvoq. Taamaattulli ikittuinnaapput, Nuuk TV-llu tamanna isiginnaartuminut erseqqissaatigisi-masariaqaraluarpaa. Tusagassiortorli taamaaliunngilaq. Akerlianik napparsimasunik toqusoqartarnera nalinginnaasoq - ima paasillugu sulisut nalinginnaasumik pipallanneri-gaat imal. piginnaaneqannginnerigaat- inerniliivoq.

Taama inerniliineq akuerineqarsinnaanngilaq, pitsaasumillu tusagassiornissamut maleruagassanut tamanut akerliulluni. Taama tusagassioriaaseq sulisunik- napparsi-masunillu nakorsartinneq iluatsissappat- nakorsamik tatiginninnissamik pisariaqartitsisunik ajoqusiivoq.

Nakorsat peqqinnissakkullu sullissisut allat Kalaallit Nunaanni napparsimasut nappaataannik kukkusumik suussusersisarnerisa imal. kukkusumik nakorsaasarnerisa nalinginnaasuunnginnera erseqqissaatigerusupparput. Pineqartut tassaapput qaqutigut pisartut ajuusaarnaqisut, peqqinnissaqarfimmiillu uagut ajuusaarutigeqisagut utoqqatsissutigisagullu.

Napparsimasut maalaarutaat
Qallunaat Nunaannut sanilliullugit Kalaallit Nunaanni napparsimasut maalaarutaat amer-lanerusut isumaqataaffigineqartartut, tusagassiortup oqaatigaa. Nunatsinnili Nakorsaaneq naapertorlugu taama oqarneq eqqunngilaq. 2014-imi Qallunaat Nunaanni maalaartut 30 %-ii isumaqataaffigineqarput Kalaallit Nunaanni 2013-imi 20%-it isumaqataaffigineqarlutik. Kalaallit Nunaannili maalaarutit ikinnerusut maalaarutillu isumaqataaffigineqartut isornartorsiui-nermillu kinguneqartut amerlassusaat ukiumiit ukiumut nikerartuarsinnaasartut, piffissami sivisunermi naliliivigisariaqarput.

Kalaallit Nunaanni napparsimasut Qallunaat Nunaanni napparsimasunut sanilliullugit amerlanerulaartut maalaaruteqartarnerat ilumoorpoq. Amerlanerilli isumaqataaffigineqartarnerat ilumuunngilaq, maalaarutit amerlassusaat Kalaallit Nunaanni nakorsaanerup pitsaassusaanik oqaatiginninngilaq. 

Tamatuma saniatigut Qallunaat Nunaanni nakorsaanermi, taama siunertaqarani kukku-nernut atatillugu, napparsimasut nakorsartinnermi anigorsinnaanngisaminnik ajoqusertut, maalaaruteqaqqaaratik napparsimasunut sillimmasiisarfik aqqutigalugu taarsiiffigitinnissamik qinnuteqarsinnaapput. Tamanna Kalaallit Nunaanni periarfissaanngimmat maalaarutit amerlanerunerannik kinguneqassaaq.

Naapertuilluartumik isornartorsiorneqarusuppugut
Imaanngilaq peqqinnissaqarfimmi isornartorsiutinik tunngavissalinnik tusarusunn-gitsugut. Taamaattoqanngilaq. Napparsimasut ilaqutaasullu naammaginninngitsut maalaaruteqartarfik aqqutigalugu maalaaruteqaqqullugit kajumissaarpagut. Tamatumani napparsimasup maalaarutaa isumaqatigineqarsinnaavoq taarsiiffigineqarsinnaallunilu, uagullu peqqinnissaqarfimmi kukkunigut napparsimasunut takkukkumaartussanut iluaqutaasussamik ilinniarfigisinnaavagut.

Ilanngussaq taamaattoq sap. ak. siuliani Nuuk TV-mit saqqummiunneqartoq peqqinnissaqarfiup isigineqarneranik ajoqusiivoq. Napparsimasut maanna siunissamilu, akuerineqarsinnaanngilluinnartumik tunngaveqartumik peqqinnissakkut sullissisunut tatiginninnertik annaasinnaavaat, ajornerpaaffimminilu toqqissisimannginneq ima annertutigilersinnaavoq nakorsartinissamut allaat sunniuteqarsinnaalluni.

Nakorsanut, peqqissaasunut sundhedsassistentinut allanullu napparsimasunik pitsaanerpaamik kiffartuussillutillu nakorsaaniarlutik ullut tamaasa annertuumik sulialinnut, soqqusaalliorluni kukkusumik nakorsaasarnerarneqarneq kajumissuseerutitsisuuvoq.

Nunatsinnisut inuiaqatigiinnguani ikittuni, kikkut tamarmik imminnut ilisarisimaffianni, tunngavissaqarata kikkunnut tamanut ammasumik immitsinnut isornartorsiornissarput mianersuulluinnartariaqarparput. Isumarput naapertorlugu tamatumani tugasassiorfiit aamma akisussaaffeqarput. Peqqinnissaqarfimmi sulisut pisuutitsinernut aalajangersimanngitsunut naammagittaannaratik allatulli ataqqinassuseqarlutik inuuneqarnissamut aamma piumasaqaateqarsinnaasutut inuupput.

Attavissaq:
Aqutsisoqarfimmi pisortaq Jóanis Erik Køtlum oqarasuaat: +299 34 43 93 imal. e-mail: sundhedsledelsen@peqqik.gl