Peqqissutsimut Naalakkersuisoq Doris Jakobsen Meeqqat Illersuisuallu Aviâja Egede Lynge tallimanngornermi 7/8- 2015 ataatsimeeqatigiipput. Ataatsimiinneq pilersinneqarpoq meeqqat inuusuttullu ikiaroornartumik hashimik atornerluinerat pillugu oqallinnerup malitsigisaanik.

Doris Jakobsenip Naalakkersuisut pinaveersaartitsineq pillugu suliassaat saqqummiuppai ilaatigut hashimik atornerluinerup millisarniarneqarnissaanut iliuusissat.
Ataatsimiinnermi Peqqissutsimut Naalakkersuisoq Meeqqallu illersuisuat isumaqatigiipput meeqqat aanngajaarniutillu pillugit iliuusissat arlallit ujartoqatigiinniarlugit.
Illuatungeriit Kalaallit Nunaanni kommunit tamaasa kaammattorpaat aanngajaarniutit pillugit politikkeqalernissaannik ilaatigut hashimik pinaveersaartitsineq siunertaralugu.
-    Kanukokap siulittaasuata ataatsimeeqatiginissaanut piareersimavunga aanngajaarniutit pillugit politikkeqalernissap eqqartornissaa anguniarlugu, Doris Jakobsen oqarpoq.
Ataatsimeeqatigiit aamma isumaqatigiissutigaat Naalakkersuisut hashimik atornerluinerup akiorniarneqarnerani iliuusissaat MIO suleqatigalugu kajumissaarutigineqassasoq.
Peqqissutsimut Naalakkersuisoq Meeqqat Illersuisuallu aamma isumaqatigiipput meeqqat nunaqarfimmiut pillugit ilisimasanik avitseqatigiinniarlutik. MIO-p augustip ingerlanerani nunaqarfiit 17-it tikeraassavai Doris Jakobsenillu septemberimi Uummannaq nunaqarfiillu aamma tikeraassallugit.




Annertunerusumik paasisaqarusukkuit, saaffigiuk Peqqissutsimut Naalakkersuisup allattaa Rosa Thorsen, e-mail: rosat@nanoq.gl oqarasuaat +299 34 66 05.