Peqqissutsimut Naalakkersuisoq Martha Lund Olsenip illoqarfinnit 15-init nunaqarfinnillu 25-init qinnuteqaatit sapaatip akunnera 18-imi aaqqissuussinernut tapiissuteqarnikkut akuerisimavai.

-”Assut nuannaarutigaara illoqarfiit nunaqarfiillu taamak amerlatigisut periarfissaq qinnuteqarnissamut atorlugu sapaatip akunnera 18-imi pisussanut aaqqissuiniarsimammata. Sapaatip akunnera 18-imi aaqqissuussisarnerit sumiiffinni toqqaveqarluarnissaat aamma oqariartuutip meeqqat inuusuttullu peqqinnissaanni inuunerannilu qanoq angajoqqaat allallu inersimasut sunniuteqartigisarnerata siammarnissaa pingaaruteqarpoq”, taamak oqarpoq Peqqissutsimut Naalakkersuisoq Martha Lund Olsen nangillunilu:

-” Meeqqagut oqaloqatigigaangatsigit, ilagalugit piffissamik atuigaangatta, sunngiffimmilu sulerineranni sammisassani tapersersoraangatsigit, inuunermi peqqinnartumi tupatorfiunngitsumi imigassartorfiunngitsumi allanillu aanngajaarniutinik atuiffiunngitsumi toqqissilluni peroriartornermut meeqqatut inuusuttuunissamullu pitsaasumik isumalimmik inuunissamik pilersitsisarpugut. Peqqinnerunissamik oqariartuut pingaartorujuk, Sapaatip akunnera 18-imi innuttaasunut aammalu inersimasut akisussaaffiannik taallugu paasititsiniummi nutaami ingerlateqqikkusupparput.”

Imigassamik aalakoornartumik pisisinnaanermut killigititaq tassa 18-inik ukioqalereer-simaneq, taamaammat inersimasut, meeqqat inuusuttuaqqallu suli 18-iliisimanngitsut imigassanut aalakoornartortalinnut periarfissinnginnissaat qulakkiissallugu, akisussaaffiat angisoorujussuuvoq.

Sapaatip akunnera 18-ip aallaavigaa innuttaasut peqqinnerunissaannut pilersaarutip Inuuneritta 2-p siunertaa meeqqat inuusuttullu atornerluisunngunnginnissaat pinaveersaassallugu, maaniinnaq inersimasut aalakoortut ersinnerat killilissallugu aalakoornartumillu atuineq annertunerpaamik killilissallugu.

Sapaatip akunnera 18 pillugu uani takusaqarsinnaavutit.

Annertunerusumik paasisaqarnissamut attavissaq peqqinnermi siunnersorti Lisa Christiansen oqarasuaat: +299 34 66 50 imal. e-mail: lich@nanoq.gl