Qinnguartaanermut atortunik, qinnguartaanermilu qarasaasiatigut programminik, assiliissutinik, qarasaasianik nutaanik siunissamilu qinnguartaasarnerup peqqinnissaqarfimmi elektronikkikkut napparsimasut suliareriikkat allattorsimaffianut atatinneqartussamut pisinissamut aningaasaliineqarsimavoq.

-”Assorsuaq nuannerpoq, kigutigissaanermut aningaasaliinermigut Candys Foundation Kalaallit Nunaanni peqqinnissaqarfimmik taperseeqqimmat. Digitalimik qinnguartaasarnermik eqqussineq, kigutigissaanermi sulisunut sullinneqartunullu malunnaatilimmik pitsanngoriaataassasoq” Peqqissutsimut Naalakkersuisoq Martha Lund Olsen-ip oqaatigaa.

-” Pilertortumik pitsaasumillu digitalimik qinnguartaasarnikkut assiliisinnaaneq atulissaaq. Ersersaasarneq pisariaarutissaaq, qarasaasiakkummi saqqummersillugit assit ingerlaannaq sullitamut ilaqutaasunullu takutinneqarsinnaalissammata. Qinnguartaanermi akuutissat atorunnaassagatsigit akuutissat aalaat pinngitsoorneqarsinnaalissapput, tamannalu kigutileriffinni sulinermi avatangiisinut pitsaaqutaassaaq,” oqarpoq kigutit nakorsaanerat Olina Hansen nangillunilu:

-” Pinaveersaartitsinermik suliavut, kigulluut caries akiorniarlugu sulini¬u¬tis¬satut siunniussami allaqqasut, eqqarsaatigalugit aningaasaliineq annertuumik iluaqutaasussaavoq. Assiliissutinik immikkut qarngup iluani assiliisinnaasunik pisinissamut tunineqarsimavugut, taamaasilluni suliaritittup malinnaavigisinnaalissavaa kigutimi misissorneqarneri. Angerlarsimaffimmi qanoq iliornissaminnut suullu eqqumaffigisariaqarneranik soqutiginninnerat, misissorneqarnerminni kiguserisut malinnaasinnaalerunik, sunniuteqarfigisinnaavaat”.

Candys Foundation siornatigut kalaallit peqqinnissaqarfiannut Dronning Ingridip Napparsimaviata MR qinnguartaammik pisinerani tapersiisimavoq.

Annertunerusumik paasisaqarniaraanni attavigineqarsinnaavoq kigutit nakorsaanerat Olina Hansen oqarasuaat: +299 34 43 94 imaluunniit e-mail: olha@peqqik.gl