Imminut toquttarnerup pinaverersaartinneqarnissaa Naalakkersuisut pingaartitaraat qanittukkullu saqqummiussami, nunatsinni imminut toquttarneq pinaveersaartinniarlugu 2013-imiit 2019-imut iliuusissatut siunniussani, qimagaasut pingaartinneqarlutik ilaapput.

Atuagaq ”Inuuneq inuuffigiuk” misigissutsinik attuisuuvoq, imminut toquttarnerup pinaveersaartinnissaanut qimagaasunullu iluaqutaasussamik unneqarissumik oqaluttuartuulluni. Qanigisaasut qulaaluat, imminut toqunnikkut qimagaasut, imminullu toqussinnaasimasut oqaluttuartuupput.

Oqaluttuat maqaasinermik, aliasunnermik, imminut pisuutinnermik, imminut annikiginermik, imminut tatiginnginnermik, namminissarsiornermik annikilliornermillu imaqartut – tamarmik oqariartuutigaat: Oqaloqatiginnigit. Ikiorneqarsinnaavutit. Kisimiinngilatit!

Inuit imminut toqunnissamik eqqarsartut, inuunermik naleqarsorinninnginnermiit aniguiniarnissaannut kajumissaarnissaat, atuakkiami siunertaavoq. Allat annaasaqarnerup kingorna inuunerminnik ingerlatseqqissinnaanerat oqaluttuanillu atuarnikkut, imminut toquttup qanigisaasa tuppallersarneqarsinnaanerat neriuutigalugu, atuakkap qanigisanit atorneqarsinnaanera siunertaavortaaq.

Atuagaq atuagaarniarfinni nioqqutaalersussaq aviisiliortunit Heidi Møllerimit aamma Juana Petrussen-imit suliaavoq, grafikerimit Nina Spore Kreutzmann-imit assiliartalersugaalluni PAARISA-lu sinnerlugu Milik Publishing-imit saqqummersinneqarluni.

Saqqummiussineq Peqqissaanermik Ilinniarfimmi tallimanngornermi juunip arfernani nal. 13.00- Naalakkersuisoq Steen Lynge qaaqqusisoralugu - ilassinninnertalimmik malunnartinneqarpoq.