Peqqinnissaqarfik pingaartumillu inuit akunnerminni tusagassiuutaasigut soorlu Facebook-ikkut annertuumik isornartorsiorneqartarpoq. Ajoraluartumik isornartorsiuineq inunnut ataasiakkaanut tunngasuusarpoq immikkullu pisimasuusarluni. Sulisunut nipangiussisussaatitaaneq pissutigalugu oqalliseqataasinnaanngitsunut taama nittarsaanneqarneq naapertuilluanngitsutut misinnarsinnaavoq. Taamaasilluni isornartorsiuineq illuinnaasiorninngortarpoq qanorlu pisoqarsimaneranik paasiniaaqissaarfiusinnaasarani. Illuatungeriit oqaloqatigiinnikkut paaseqatigiissinnaanngillat, uagullu peqqinnissaqarfimmi pisoq paasisimasaqarfiginerulersinnaanatigu. Allannguutaasariaqarsinnaasut iliuuseqarfigineqarsinnaanngillat.
Isornartorsiuineq nalinginnaasuussinnaavoq - soorlu atsiornernik katersineq innuttaasullu peqqinnissaqarfimmit sullinnerlugaasutut misigisimanertik pillugu atsiorsimasut. Innuttaasut naammaginngisaminnik apuusserusussinnaanerat paasineqarsinnaavoq. Kisiannili isornartorsiuineq taama tigussaanngitsigisoq kinguneqarsinnaanngilaq. Isornartorsiummi taamaattumi ajornartorsiutip qiterisaa suunersoq paasitinneqanngimmat, kiffartuussinerup pitsanngortinnissaanut atorsinnaanngilarput.
Akerlianilli soqutigittaatsumik isornartorsiuinikkut peqqinnissaqarfimmi sulisut sapiissusertik annaasinnaagaat misigaarput, napparsimallutik sulinngitsoortut amerlipput allallu suliffimminnit soraarlutik. Tamatuma saniatigut peqqinnissaqarfiup ajortutut oqallisaanera innuttaasut napparsimasullu akornanni tatiginninnerup pisariaqartinneqartup nukillaarsarneqarneranik kinguneqassaaq.
Peqqinnissaqarfimmik isornartorsiunissaq pinngitsoorani inissaqartinneqassaaq. Innuttaasut ajornartorsiutinik naammattoorsisut maalaarutinik tigussaasunik tusarfigerusussaqaagut. Naammaginanngitsumik sullissisimassagutta tusarusupparput. Aatsaat taamaaliornikkut pitsaanerulersinnaavugut. Ilinniutigisinnaassagutsigilli, maalaarutit tigussaasuussapput, kinguneqarsinnaallutik maalaaruteqartarfillu aqqutigalugu saqqummiunneqarnikkut eqqortumik ingerlanneqassallutik. Innuttaasut taamaasillutik peqqinnissaqarfimmik pitsaanerulersitseqataasinnaapput.
Sisimiuni isornartorsiuineq
Kingullermik isornartorsiuineq Peqqinnissaqarfik Qeqqani sullinneqarnermut tutsinneqarpoq. Peqqinnissaqarfimmi qullersaasut Qeqqatalu Peqqinnissaqarfiani pisortat, Sisimiuni innuttaasunut peqqinnissakkut kiffartuussinerup pitsanngorsarnissaanut periarfissanik nutaanik ujartuiuarput, uagullu isumarput naapertorlugu ingerlalluartumik peqqinnissaqarfeqarpugut. Qeqqata Peqqinnissaqarfiani pisortat ilinniarluarsimasunik suliffimminnullu tunniusimalluartunik aalajaatsunik illugiinnik oqaasilinnik amerlasuunik- innuttaasunik naapitsinermi pingaaruteqaqisunik- sulisoqarput.
Taamaakkaluaq peqqinnissaqarfimmit sullinneqarsinnaanermut neqeroorutinut naapertuutinngitsumik naatsorsuutigisaqartunik innuttaasut ilaqarnerat nassuerutigisariaqarparput. Ajoraluartumilli peqqinnissaqarfinni amerlanerni- taamatuttaaq Qeqqata Peqqinnissaqarfiani- taamaappoq.
Innuttaasut amerlasuut naammagittaalliornerannut tamanna nassuiaatit ilagisinnaavaat.
Naammagittaalliornerulli sulisunut tutsinnera iluaqutaanngilaq. Peqqinnissaqarfiup pisortanit ingerlanneqartutut allarpassuartulli aningaasaqarnera killeqarpoq, sulisullu pisinnaanertik tamaat suliniaraluarpataluunniit naatsorsuutigineqartut immaqa eqquutsinneqarsinnaassanngillat.
Uagut misigisagut naapertorlugit sulisugut tunniusimallutik sapinngisaq tamaat pitsaanerpaamik kiffartuussiniartarput. Ullut tamakkiallugit annertuumik suliaqartarput. Innutaasutulli pitsanngorsarneqarsinnaasunik misigisaqaraanni siullermik eqqissilluni sulisunik /nunap immikkoortuani peqqinnissaqarfimmi pisortanik oqaloqateqqaarnissaq kajumissaarutigaarput. Suleqatigiinnikkut oqaloqatigiinnikkullu ajornartorsiutit qaangerneqarsinnaagajuttarnerat upperaarput.
Nappaatip sakkortuumik eqquisinnaasarnera ilaqutariinnillu anigoruminaatsumik nalaataqartitseriataarsinnaanera ilisimavarput, qisuariarfigineratalu sakkortusinnaasarnera paasisinnaallugu. Tamakku peqqinnissaqarfimmi paasineqarsinnaassapput. Amerlanertigulli anigoruminaatsumik nalaataqariasaarneq qaangiutiimippat, nakorsartinnerup qanoq ingerlasimanera pillugu oqaloqatigiinneq tamanut oqiliallatitsisarpoq. Taama oqaloqatiginninnissaq- ilaqutariit eqqarsaatigalugit uagullu nammineq silatunerulersinnaajumalluta piareersimaffigiuassavarput.
Maalaarutit aviisitigut inuillu akunnerminni tusagassiuutaanni saqqummiunneqartut uagut isumarput malillugu peqqinnissaqarfiup pitsaanerulersinnissaanut aqqutissaanngillat. Akerlianilli peqqinnissaqarfik innuttaasunik pitsaanerpaamik kiffartuussisoq suliffigissallugulu kajungernartoq anguniagassatut siunniunneqarpat, suleqatigiinneq kinguneqartussamillu isornartorsiuineq atorsinnaapput.
Jóanis Erik Køtlum
(jek@peqqik.gl)
Aqutsisoqarfiup Pisortaa
Peqqinnissaqarfiup Qullersaqarfia