Peqqissuunissaq anguniarlugu suliniutinnut aningaasanik qinnuteqarit
Najukkanni suliniummik peqqinnerulersitseqataasussamik isumassarsiaqarpit? Taamaappat massakkut Inuunerittamut aningaasaliissutinik qinnuteqarsinnaanngorputit. Ukioq mannamiit ukiumut ataasiaannarluni aningaasanik qinnuteqartoqarsinnaalerpoq.
Innuttaasut peqqissuunissaat anguniarlugu suliniut Inuuneritta II naapertorlugu, ukioq manna timimik atuineq iluuseqarfiginiarneqarpoq. Taamaammat sammisat suliniutillu- meeqqat, inuusuttut ilaqutariillu akornanni timimik atuinerulersitsisut, Peqqissutsimut Naalakkersuisoq Martha Lund Olsen aningaasaliissutinik agguaalerpat, salliunneqassapput.
- ”Najukkani suliniutinik innuttaasunik peqqinnerulersitsisinnaasunik tapersersuinissaq Inuunerittamut aningaasaliissuteqarnermi siunertaavoq. Peqqinnerulernissaq anguniarlugu suliniuteqarnerup, inuiaqatigiinni qanoq inissisimaneq apeqqutaatinnagu, tamanut atuutsinnissaa pingaaruteqarluinnarpoq. Inuunerittamut aningaasaliissutitigut kikkulluunniit kajumittut, piumassuseqartut isumassarsiaqartullu inuiaqatigiit peqqinnerulernissaat anguniarlugu suleqataanissaannut periarfissinneqarput”, peqqissutsimut Naalakkersuisoq Martha Lund Olsen oqarpoq imalu nangilluni:
-”Nuummi sisorartartut peqatigiiffiannit NSP-mit siorna sisoraatinik atortussanillu allanik pisinissamut Inuunerittamut aningaasaliissutineersunik tunineqartumit e-mailisivunga. NSP-mit sisoraatinik akeqanngitsumik atorniarsinnaalerneq iluatsilluarsimasoq klubbip siulittaasuata oqaatigaa. Inuit siornatigut ujakkaarnissamut periarfissaqarsimanngitsut, maanna periarfissaqalerput. Inuunerittamut aningaasaliissutit najukkani peqqissutsimik siuarsaaqataasinnaanerannut assersuutit taanna ilagiinnarpaat.”
Inuunerittamut tunngatillugu aningaasaliissutinik qinnuteqarsinnaaneq apriilip aallaqqaataanut 2015 killeqarpoq, maannalu qarasaasiakkut qinnuteqarsinnaanngorputit.
Uani qinnuteqarnermi immersugassaq paasissutissallu allat takukkit.
Inuunerittamut aningaasaliissutit Kalaallit Nunaanni innuttaasut peqqissuunissaat anguniarlugu suliniutip Inuunerittap atuutilerneranut atatillugu pilersinneqarput.
Paasissutissat sukumiinerusut peqqinnissaq pillugu siunnersortimut
Lisa Christiansen-imut oqarasuaatikkut: +299 34 66 50 / e-mail-ikkut: lich@nanoq.gl imal. paasissutissiisartumut Aqissiaq Møller Mathiassen-imut oqarasuaatikkut: +299 34 66 90 / e-mail-ikkut: aqma@nanoq.gl attaveqarnikkut pissarsiarineqarsinnaapput.