Nerisat imikkallu
Nakorsaatitukkat nerisannit imikkaniillu sunnerneqarsinnaapput. Tamanna nakorsaatitukkavit sunniunnissaannut allannguisinnaammat nakorsartinnerit naammaginartumik kinguneqarnavianngilaq. Nakorsaatit ilaat nerinermut atatillugu iisassaapput allaalli nerinissaq sioqqullugu tamatumaluunniit kingorna iisassaallutik. Taamaammat nakorsaatip qanoq atornissaanut puuani allagartami allassimasoq tamatigut atuaruk. Nalorniguit nakorsaat pillugu paasissutissat uani pissarsiarisinnaavatit, nakorsaatit puuannut ilanngussaq atuarsinnaavat nakorsaatilerisumulluunniit apeqqutilliillutit.
Naartuneq milutitsinerlu
Naartuguit milutitsiguilluunniit nakorsaativit meeqqat sunnersinnaavaat. Taamaammat nakorsiarnissamut - nakorsaatinillu inniminniiguit aalleruilluunniit, milutitsiguit naartuguilluunniit, nakorsaq, peqqissaasoq nakorsaatilerisorlu tamatigut ilisimatittaruk. Nakorsaatit naartunermi milutitsinermiluunniit atorneqarsinnaanersoq nalornigukku nakorsaammut tunngatillugu paasissutissat uani nassaarisinnaavatit, paasissutissiissut nakorsaatinut ilanngussaq atuarsinnaavat nakorsaatilersorluunniit aperalugu.
Nakorsaatinik toqqortaqarneq suujunnaarsitsinerlu
Nakorsaatit kissassutsimit annertuumik sunnerneqartarput. Nakorsaatit nakorsaataasivimmit aasatit inip kissassusaaniitinneqartussaanngikkunik (8-25 grader celsius) nillataartumiissapput (3-8 grader celsius). Puuanni sumiitinnissaannut pissutsit immikkut ittut- soorlu kissarpalaamiitinneqaratilluunniit nillerpallaamiitinneqannginnissaat allassimassaaq. Nakorsaatisatit iisartakkanut puussiamut ikillugit tunniunneqarpata- allagartaani allamik allassimasoqanngippat- nakorsaat tamatigut inip kiassusaaniititassaassaaq. Nalorniguit nakorsaat pillugu paasissutissat uani pissarsiarissavatit, paasissutissiissut nakorsaatinut ilanngussaq atuarsinnaavat nakorsaatilersorluunniit aperalugu.
Nakorsaatit pisoqalisimasut illersorneqarsinnaasumik pinngortitamullu qajassuartumik suujunnaarsinneqassapput taamaammat nakorsaatit pisoqalisut tamarmik nakorsaataasivimmut tunniunneqassapput.
Paasissutissat allat
Paasisutissiissut atorfissaqartitat pissarsiarinngiliuk? Nakorsaatit pillugit paasissutissat allat min.medicin.dk-mi atuarsinnaavatit, nakorsaatinnut paasissutissiissut atuarsinnaavat nakorsarluunniit attavigalugu.