Ulluni marlunni angajoqqaajuneq misilikkusuppiuk?
Inuusamik naalungiarsummik paarserusuppit?
9. klasse-mi atuartuuit?

Paasissutissat

9. klasse-mi atuartuuguit inuusamik elektroniskimik Real Care® -imik ulluni unnuanilu marlunni paarsinissamut periarfissaqarsinnaavutit.
Inuusaq meeraaqqatut pissuseqarpoq.
Nangilersugassaasarpoq, nerisitassaasarpoq, inequtassaasarpoq innartitassaasarlunilu. Naammagittarunnaarlutit assersuutingalugu inuusaq angajoqqaannut qimassimagukku, inuusaq ”oqaatilliissaaq”.

Illit klassimilu atuaqatitit inuusarnikkut meerartaarnissamut piareernermut suliniuteqartunit pulaarneqarussi, siullermik angajoqqaajunissamut piareersarneqassaatit. Illit atuaqatitillu naalungiarsuup pisariaqartitaanik qanorlu paarineqarnissaanik ilinniartinneqassaasi.
Angajoqqaajuneq angajoqqaajulluarnerlu qanoq paasisariaqarnersut ilaatigut oqallisigineqassapput. Tamatuma kingorna kajumittut tamarmik inuusamik tunineqassapput.
Inuusaq paarereerukku peqatigiilluta qanoq ingerlasimanersusi paasiniassavarput. Inuusaq qanoq paarineqarsimanermut paasissutissiisinnaasumik iluanut ikkussamik maluginiuteqarpoq. Inuusarnissinni misilittakkasi klassimi ataatsimoorluta aamma oqaluuserissavagut.
Taamatuttaaq meerartaarnissaq pillugu qanoq eqqarsaateqarnersi oqaluuserissavarput.
Atoqatigiinneq pillugu ilinniartitsineq naartunaveersaatinillu atuineq naggasiutigissavagut.
Illit klassimilu atuaqativit, ilinniartitsisussi peqataasinnaanera aalajangissavarsi.
Atoqatigiinneq pillugu ilinniartitsineq, ilaatigut peqqinnartumik atoqatigiinnermut ilitsersuinerussaaq, atoqatigeeriaatsit assigiinngitsut oqallisigineqassapput, sungiusaatinilli quianartunik ilaatigut ”usuup puuanik arpaliussineq”-mik ilaqassalluni.

Inuusamik paarsaqarusukkuit

Ilinniartitsisut- inuusarnermik ilinniartitsisumut paarisa@nanoq.gl -imut allallutit apeqquteqartissinnaavat.