Paasissutissat
Naartunerpit nalaani pitsaasumik naartunissat meeqqavillu inuunerminik ajunnginnerpaamik aallarniinissaa eqqarsaatigalugit immikkut pingaaruteqarpoq peqqinnartunik assigiinngiiaartunillu nerisarnissat innersuussutillu atuuttut malinnissaat.
Naartuninni naammattunik nerisarnissat eqqaamassavat, annikippallaanngitsunik annertuallaanngitsunillu.
Naartunerup nalaani annertunerungaatsiartumik nerisarnissaq pisariaqanngilaq, oqariartaaseq ”Inuit marluk sinnerlugit nerisarnissaq” upperisapalaatoqaannaavoq ilumoortuunngitsoq.
Illit nammineq meerassallu pitsaanerpaanik atugassaqaqqullusi naartunerpit nalaani peqqinnartunik nerisarnissat pingaaruteqarpoq. Nerisassat assigiinngiiaartuussapput vitamineqarluartut mineraleqarluartullu, illillu meerassavillu nukissasi inuussutissanillu pisariaqartitasi nerisassatigut pisassavasi.
Matumani ikiuutaasinnaavoq nerisavit Nerisaqarnermut innersuussutit qulit – naartusunut milutsitsisunullu tulluarsakkat naapertorlugit akuleriissittarnissaat, naartusut nerisassaannut tapertaliussassatut innersuussutigineqartunik ilallugit.
Neqeroorut
Naartunerpit nalaani misissortittarninni peqqinnissaqarfimmi sulisut ilinnik nakkutiginnittut nerisassat pillugit oqaloqatigisinnaavatit.
Nammineq qanoq iliuuseqarsinnaavunga?
Naartunermi pingaaruteqarpoq ilisimassallugu naartunerup nalaani nerisat imikkallu meeqqap ineriartorneranut sunniuteqarsinnaasut. Arnat amerlanersaasa naartulinnginnerminni inuunertik ingerlatiinnarsinnaavaat, matumanili naartusutut nerisassavit akuleriiaarnissaannut piviusunik siunnersuutissaqarpoq.
Nerisaqarnermut innersuussutit qulit
Naartusunut milutsitsisunullu nerisaqarnermut innersuussutit tulluarsakkat.
1. Allanngorartunik nerisarit
2. Kalaallit nerisassaataannik nerisarit*; akulikitsumik aalisakkanik aalisakkanillu qallersuusianik
3. Paarnanik naatitanillu ullut tamaasa nerisarit
4. Iffiukkanik seqummarluttunit sanaanik, issingigassanik suaasanillu ullut tamaasa nerisarit, naatsiiat, qaqorteqqasut pastalluunniit akulikitsumik pisakkit
5. Eqqarsarluarlutit orsutortarit
6. Sukkunik, mamakujuttunik, chipsinik kaaginillu annikitsuinnarmik nerisarit
7. Imermik immummillu imertarit – annikitsuinnarmik saftimik sodavandinillu imertarit
8. Akulikitsumik nerisarit, ingasaannaguli
9. Ullormut minnerpaamik nal. ak. ataaseq timit aalatittaruk
10. Suut nerinerlugit eqqarsaatigisaruk
*Naartusut milutsitsisullu assigiinngissitaartunik kalaallit nerisassaataannik nerisarnissaannik kaammattorneqarput, taamaattorli pingaartumik nannut, arferit kigutillit, timmissat imarmiut puisillu utoqqaanerusut neqaat tunuarsimaarfigineqassapput. Neqit tamakku assersuutigalugu aalisakkanik miluumasunillu nunamiunik, soorlu tuttut, umimmaat kiisalu savat Kujataaneersut neqaannik taarserneqarsinnaapput.
Naartunerup nalaani amerlanerpaanut vitamininik mineralinillu pisariaqartitsineq nalinginnaasumit annertunerusarpoq. Pingaartumik folsyre, D-vitamin aamma aagissaatit.
Naartusunut innersuussutigineqarpoq nerisat tapertassaannik makkuninnga pisassasut:
- Folsyre: 400 µg ullormut, naartunermi sapaatip akunnerini 12-ini siullerni
- D-vitamin: 10 µg ullormut, naartunerup nalaa tamaat
- Aagissaatit: 40-50 mg ullormut, naartunermi sapaatip akunnerisa qulinganniit naartunerup sinnera tamaat
- Calcium (kalk): naartusut immuttortaratillu immussuartorneq ajortut ullormut 500 ,mg calcium iisariaqarpaat. Calcium ilaatigut saarnit ineriartornerannut pingaaruteqarpoq.
Naartusut makku pinaveersaassavaat:
Tinguit aamma tinguk aatsitaq.
Pingaarnertut nerinermi tingunnik nerinissat imaluunniit tingummik aatsitamik pisarnissat inassutigineqanngilaq, taakku A-vitaminimik akoqarpallaarnerat pissutaalluni naartup iloqiaassuteqarsinnaanera annertusisarmat. Tinguaraq patéllu A-vitaminimik akoqarpiannginnamik nalinginnaasumik nerineqarsinnaapput.
Imigassat aalakoornartullit.
Naartuninni imigassartortarnissat inassutigineqanngilaq. Imigassaq aat aqqutigalugu arlaakkoorluni meeqqamut annguttarpoq. Naartoq ilumiinnini tamaat imigassap ajoqusiisinnaaneranit akornuserneqarsinnaavoq.
Imerneqarsinnaasut koffeinitallit
Kaffi, tii, cola aamma imertakkat sukkassaatitallit energidrikkit annertuumik koffeinitaqarput. Koffeinimik annertuallaamik pisaruit naartunerit naartullu ajortumik sunnersinnaavatit. Taamaattumik naartunerpit nalaani annerpaamik tiitorfinnut marlunnut-pingasunut naapertuuttumik kaffisortarnissat inassutigineqarpoq. Rooibos tiimik, kamilletiimik imaluunniit naatitanit tiiliamik imertarit, taakku koffeinitaqanngimmata. Energidrikkitunngilluinnarnissat inassutigineqarpoq.
Qanigisat
Naartusumut aappaaguit allatulluunniit qanigisaaguit peqqinnartunik nerisaqarnissaanut tapersersuinissat pingaaruteqarpoq. Matuma ataani pitsaanerpaamik qanoq iliornissannut siunnersuutitsialaat takusinnaavatit:
- Peqqinnartunik toqqaanissamut iliuuseqarit
- Naartusoq peqatigalugu sapaatip akunneranut nerisassat pisiassallu pilersaarsiorsigik malillugillu
- Peqqinnartunik toqqaaneq pisariitsunngortiguk
- Suut imernerlugit eqqarsaatigisakkit, kaloriarpassuit pisariaqanngitsut imertakkaniittarmata.
Saaffiginninnissamut paasissutissat
Naartunerpit nalaani eqqortumik nerisaqarnissat nerisallu tapertassaannik pisarnissat annertunerusumik paasisaqarfigerusukkukkit juumuut, nakorsat imaluunniit peqqinnissaqarfimmi sulisut allat isumasiorlugit apersortasinnaajuaannarpatit.
Ernereernermi, Ernineq, Meerartaarnissamut piareerneq, Naartuneq
Naartunermut tunngasut pillugit
Nerisaqarnermut innersuussutit qulit
Nerisaqarnermut innersuussutit qulit pillugit una takuuk
PDF
Naartusunut meeqqanullu minnernut nerisassat innersuussat
Mingutsitsineq kalaallillu nerisassaataat. Qangaaniilli nerisartakkavut toqqissilluta nerisinnaavagut?
Nittartakkat
- http://www.altomkost.dk/Anbefalinger/Gravide/forside.htm
Naartusunut app.
- http://www.sundhedsoplysning.dk/