Aaversinnerpi inerneri akissutisiffigissavatit. Juumuup akissutisiat nassuiaateqarfigissavai.
Juumooq/sundhedsassistenti naartunermut atatillugu allattugaatinut nalunaarsuissaaq. Nalinginnaasumik peqqissutsit, peqqinnartumik inuuneqarneq, nerisat imikkallu peqqinnartut, timigissarneq , tupa/hashi imigassarlu oqaluuserissavasi. Naartusarnitit ernisarnitillu, meeraanerit/meeraanersi peroriartornerlu, massakkut inuunerit/inuunersi qanoq ingerlanersoq, angajoqqaanngornissamut/erninissamut piareersarneq MANU oqaluuserisavasitaaq. Paasissutissat tunniussatit/tunniussasi aallaavigalugit- naartunerup nalaani meeqqallu inuunermini aallartilluarnissaa qulakkeerniarlugu- ukiuani siullermi immikkut iliuuseqarfigineqartariaqarnissarsi juumuup naliliivigissavaa. Oqaloqatigiinnermi illit juumuullu ilisareqatigiinnissarsi siunertaavortaaq, nalorniguit/nalornigussi apeqquteqarsinnaavusi.
Juumuumiit anitinnak/anitinnasi tulliani misissortinnissaq isumaqatigiissutigereertariaqarparsi. Pisariaqalissappat juumuup tamatigut nakorsamut innersuussinnaassavaatit.