Qanoq inissinneqarsimaneq aallaafigalugu ullormusiat qanoq tunniunneqassanersut naatsorsorneqartarpoq. Peqqissarnermi Danmarkimiitilluni ullormusiat assigiinngissutaat annertussusaallu ataani takuneqarsinnaavoq.
Naliginnaasumik
Periarfissat marlunnut immikkoortitigaapput:
- Tamakkiisumik nerisaqartitaaneq
- Nerisat tamarmik peqqinnissaqarfimmit aningaasartuutigineqartarput. Peqqissartut ullormusiaqarsinnaanngillat.
- Ullormusiat
- Peqqissartup nerisaqarnini nammineq isumagissavaa tassungalu aningaasartuutinut ullormusianik pisassalluni.
Neqeroorutigineqartunut assersuutit ataani takuneqarsinnaapput:
Naliginnaasumik ineqartitaaneq
Tamakkiisumik nerisaqartitsinissaq, Kalaallit Peqqissartut Illuanni ineqartitsineq peqqissartullu angallanneqarnera, naliginnaasumik ineqartitsinermi peqqinnissaqarfiup isumagissavai.
Kalaallit Peqqissartut Illuanni inissiani ineqartitaaneq
Inissiani ineqartitsineq ilaqutariinnut meerartalinnut inniminnigaavoq. Peqqissartut nerisaqarnertik tamaat isumagissavaat. Tamatumunnga ullormut 125 kr. ullormusiatut tunniunneqartarput. Napparsimanerup malitsigisaanik allamilluunniit peqquteqartumik nerisassiorsinnaaneq ajornarsippat, tamakkiisumik peqqissartut illuanni nerisaqartitaaneq toqqarneqarsinnaavoq ullormusiallu unitsillugit. Taamatut pisoqartillugu katsorsartikkiartornermut utimullu angallanneqarnissaq periarfissaritinneqarpoq.
Peqqissartunut sivisuumik Danmarkimiittunut, Kalaallit Nunaannukarsinnaanngikkallartunut, ilaquttanik tikeraartoqarsinnaaneq periarfissaavoq, soorlu juullikkunni. Tamanna Kalaallit Peqqissartut Illuannik isumaqatigiissuteqarnikkut periarfissaavoq, inissianilu ineqartunut taamaallaat.
Najugaqartunik innimittarneq
Kalaallit Peqqissartut Illuanni najugaqartut arlallit peruluttuupput. Peqqissartut eqqissisimasumik najoruminartumillu avatangiiseqartinnissaat qularnaarusupparput. Taamaammat peqqissartut illuat pujortarfiunngilaq. Silamili pujortartarfiliami najugaqartut pujortarsinnaatitaapput. Imigassartorneq aanngajaarniutinillu atuineq aamma inerteqqutaavoq. Aalakoortut Kalaallit Peqqissartut Illuanni inissaqartikkuminaapput. Aalakoortillutik pulaartut anisinneqartarput.
Rigshospitalimi Patienthotelimi inissinneqarneq
Peqqissartut Rigshospitalimi Patienthotelimi ineqartinneqartut tamakkiisumik nerisaqartinneqartarput ullormusianillu tunineqartaratik. Peqqissartut illuanni nerisarfimmi inissaqartillugu nalunaaqqaarnikkullu, nerisassanik pisisoqarsinnaavoq akigitat atuuttut naligannik.
Hotelimi inissinneqarneq
Peqqissartut hotelimi inissinneqarsimasut hotelimi ullaakkorsiortarput. Taakkununnga ullormusiat ullormut 100kr.-nik annertussuseqarput. Hotelimi inissinneqarsimasut peqqissartut illuanni nerisassanik pisisinnaapput ullaakkut nalunaaqqaarnikkut. Napparsimmavinnut utimullu angallanneqarnerat allatulli ingerlaannartarpoq.
Nammineerluni inissarsineq
Ilaquttani, ikinngutini allatulluunniit nammineq isumagisamik ineqarnissaq peqqissartunut aamma periarfissaavoq. Tamatumani napparsimmavimmukarnerni aallariartornermilu angalaneq peqqissartup nammineerluni isumagisarpaa. Inersimasut ullormut 250kr.-nik meeqqallu ullormut 50.-nik ullormusiaqarsinnaapput. Nakorsaatinut aningaasartuutit aamma utertinneqarsinnaapput, pisinermut uppernarsaatip nakorsaatinullu allagartap takutinnerani.
Allaaserisanit takusinnaavatit 1 -mut 4