Qanigisaasut

Qanigisaasut akeqanngitsut

Peqqissartut tamarmik Kalaallit Peqqissartut Illuanni inissaqartillugu, qanigisaasumik akeqanngitsumik ataatsimik ilaqarsinnaapput. Taamaammat inissaqarnersoq misissoqqaarnissaa innersuussutigilluarsinnaavarput. Inimummi marluuttarissamut peqqissartoq inissinneqarsimaguni allamillu ineqateqarluni, qanigisaasoq pineqartoq inissaqartitaanavianngimmat. Peqqissartoq napparsimmavut unitsillugu ini tigummiinnarneqarsinnaanngilaq, periarfissallu allat innersuussutigisariaqarpagut. Uninnganissaq sivisunerpaamik ullunik 1-3 sivisussuseqassappat inissaqartillugulu ini tigummiinnarneqarsinnaavoq.

Peqqissartu Illuanni pisortap peqqissaasullu pisortaata tamanna aalajangertarpaat. Peqqissartup ikiortariaqarnera tamatumunnga peqqutaasarpoq.

Akeqanngitsumik qanigisaalluni angalaqataasunut makku atuupput:

• Danmarkimut utimullu billetti nammineq isumagineqassaaq. Aallannginnermi kommunemut imaluunniit SIK-mi isumaginninnermut aningaasaateqarfinnut taperneqarnissamut qinnuteqartoqarsinnaavoq.
• Ineqarnermut ullaakkorsiornermullu akiliunneqartarput, nerinerilli sinneri nammineq akilerneqartassallutik. Nerineq 50kr.-nik akeqarpoq.
• Peqqissartup ikiortarnissaa.
• Illup takujuminartuunissaanik torersuutinnissaanillu ikiuuttarnissaq, torersaanikkut, siniffiup piareersartarnerani allallu.
• Nereqataasinnaanngikkaani igaffiup nalunaarfigisarnissaa.
• Illumi pulaartutut ineqarnermut nalimmassarnissaq, pissuserisakkut malittarisassallu atuuttut malinnerisigut.

Peqqinnissaqarfiup isumagisaanik angalaqataaneq

Peqqissartoq angalanermini Danmarkimiinnerminilu ikiortariaqarnera nalilerneqarsimappat, peqqinnissaqarfiup isumagisaanik angalaqataasoqarsinnaavoq. Tamanna peqqinnissaqarfiup nalilersuineranik tunngaveqartarpoq.

Peqqinnissaqarfiup isumagisaanik angalaqataasunut makku atuupput:

• Billettimut siumut utimullu akiliunneqartarput.
• Peqqissartup ikiortarnissaa, ikiuunnissamullu piareersimanissaq.
• Ineqarnermut akiliunneqartarput nerinernilu tamani nereqataasinnaallutik.
• Illup takujuminartuunissaanik torersuutinnissaanillu ikiuuttarnissaq, torersaanikkut, siniffiup piareersartarnerani allallu.
• Nereqataasinnaanngikkaani igaffiup nalunaarfigisarnissaa.
• Illumi pulaartutut ineqarnermut nalimmassarnissaq, pissuserisakkut malittarisassallu atuuttut malinnerisigut.