Peqqissartut qanigisaasullu tamaasa kajumissaarusuppagut, aallartinnatik initik torersarluarsimasassagaat. Sikaavinni qernertunik puussiarsuaqarpoq, nerisakunut, ingitassanut assigisaannullu atorneqartussat. Puussiarsuit amigaataappata sulisunut nalunaarutigineqassaaq.
Pigisat pisataasivimmi napparsimmavimmi uninnerup nalaani angerlarallarnermiluunniit qimakkallarneqarsinnaapput. Inissaq killeqarmat qaammatit pingasut qaangiunneranni pisattat peerneqartarput. Pigisat inuttaata aqqa, napparsimmavimmut uninnerup ullua, sumiinnera ullorlu uterfissaq ersarissumik allanneqarsimassapput.
Katsorsartinnerit akornanni angerlarallarneq
Katsortartinnerit akornanni Kalaallit Nunaannut angerlarallarsinnaaneq peqqissartumut periarfissaavoq. Tamannali katsorsartinnermut sanilliullugu isumannaatsuussaaq, Kalaallillu Nunaanni peqqinnissaqarfiup akiligarippagu sulisut peqatigalugit aalajangerneqartarluni. Angalanissamut periarfissat, ornitassaq, aningaasartai peqqissartullu qanoq innera naliliinermut tunngaviusarput. Billettimik inniminniinnginnermi periarfissat sulisut peqatigalugit eqqartorneqaqqaartassapput. Kalaallit Peqqissartut Illuanni pisortap niviarsiallu pisortaata kisimik tamanna aalajangertarpaat.
Kalaallit Nunaannut aallarneq
Peqqissartup Danmarkimi katsorsartinnera naammassippat aallarnissaminullu piareertutut nalilerneqarpat, timmisartumik aqqutissaq siulleq atorlugu, Kalaallit Peqqissartut Illuanni angalanermut ataqatigissaarisut billetti inniminneertarpaat. Peqqissartup angerlarnissaa najukkami napparsimmavimmut peqqissartut illuannit nalunaarutigineqartarpoq. Peqqissarnerup ingerlaqqinnissaanut pilersaarusiortoqarsimappat aamma taanna ilanngullugu nassiunneqartarpoq. Aallartussaq bussinik mittarfiliaanneqassaaq. Angerlartinnani ilaquttat allalluunniit pulaaqqaarusukkaanni, angerlamut aallarnissaq kinguartinneqarsinnaavoq. Katsorsartinnerup naammassinerani angerlarnissamut billetti pisiarineqareersimappat billettimik allamik pisisoqarsinnaanngilaq, billetti pisiarineqartoq allanngortinneqarsinnaanngimmat. Angerlamut aallarnissaq pisinnaalerneraniit, ineqarneq nerisaqarnerlu peqqissartup akisussaaffigilissavai.