vælg et emne
... sammisaq toqqaruk

HIV/AIDS

NAPPAAT SUMIIPPA?
AIDS nappaataanngilaq aalajangersimasoq ataaseq, virusimilli HIV-mik taaneqartartumik siusinnerusukkut tunillatsissimanerup kingunerisaanik, kiisalu timivit akiuussutissaqarnerata naammaginartumik suliunnaarneranik pissuteqartumik, nappaatinut arlalinnut pilersunut taaguutaalluni.

NAPPAAMMUT SUNA PISSUTAAVA?
Aap qaqortortai pingaaruteqaqisut HIV-p saassuttarpai aserorterlugillu. Aap qaqortortaasa suliassarivaat virusinut allanut, bakteerianut svampinullu illersussallutit, nappaatit taakku kialluunniit timimut pulasoorutiginngitsoorsinnaanngilai. Sananeqaatit taakku timitta akiuussutissaqarneranut pingaaruteqarluinnartut ilagaat. Sananeqaatit taakku aserorneqarnerisigut nappaatit nalinginnaasumik pinartoqartanngikkaluartut ilungersunarseriataarsinnaapput inuunermillu ulorianartorsiortitsilersarlutik. Assersuutitut taaneqarsinnaavoq puallunneq. HIV-mik tunillatsinninniit ukiut arlallit nalinginnaasumik ingerlareerpata aatsaat nappaatit taakku ilaannik ataatsimik imaluunniit amerlanertigut arlalinnik nappaateqalissaatit - tassa AIDS-eqalissaatit. HIV, taamaallaat aammi, anisuumi kiisalu qulluup qinersiisa seerineranni takussaasoq aammut toqqaannartumik isernermigut aatsaat tunillaasinnaavoq. Kalaallit Nunaanni nalinginnaanerpaamik tuniluuffiusoq tassaavoq atoqatigiinneq, aammali naartunermut erninermullu atatillugu anaanamit qitornamut tunillaasoqartartoq takussaasarpoq.

NAPPAAT QANOQ MALUGISSAVIUK?
HIV-mik tunillatsissimaneq malugineqartuaannanngilaq. Amerlasuutigulli nuallunnertut ittumik malunniuttarpoq. Malunniut qaangiuttarpoq, malitsigisarpaali sapaatit akunnerini arlalinni qasoqqanerujussuaq.
Tamatuma kingorna tunillatsissimasoq ukiuni arlalinni peqqissuusutut amerlanertigut misigisimasarpoq.
HIV-mik tunillatsissimasut amerlanersaat ukiualunnguit qaangiunneranni napparsimalertarput. Qasoqqaneq, unnuami aallerneq kiisalu imiusap sorujuiarneqartarfiisa pullattarnerat nalinginnaasuupput, malitsigisarpaallu qanermi svampeqarneq, pualluneq kiisalu ilaannikkut kræfteqarneq immikkut ittumik. Timminneq sanigornerlu takussaagajupput.

NAPPAAT QANOQ KATSORSARNEQASSAVA?
HIV akiorniarlugu kiisalu virusi aammiittoq annikillisarniarlugu katsorsaatinik sunniulluarnerusinnaasunik nutaanik ineriartortitsisoqartuarpoq. Nakorsaatinik assigiinngitsunik arlalinnik tunniussinissaq amerlasuutigut pisariaqartarpoq, kiisalu qanimut malinnaaffigineqarnissaq aaversittarnissarlu pisariaqarpoq.

NAMMINEQ QANOQ ILIORSINNAAVIT?
AIDS nappaataammat ulorianartoq ilinnut pingaarnerpaassaaq HIV-mik tunillatsinnginnissat. Tassunga atatillugu pingaarnerpaaq tassaavoq illit allamik atoqateqassaguit isumatusaarnissat - tassa sapinngisamik isumannaannerpaamik atoqateqarnissat.
Aalajangersimasumik ataasiinnarmik tatiginartumillu atoqateqartanngikkuit, usuup puuanik tamatigut atuisarnikkut tunillatsinnginnissat qulakkeersinnaavat - imaluunniit atoqateqanngilluaannarit!
Arnallu tunillatsissimallutik nalunnginnittut naartulernaveersaartariaqarput, tassa meeqqap tunillanneqarsinnaaneranut ulorianartorsiorneq pinaveersaarniarlugu.

KALERRISAARUT
Tunillatsissimasinnaanerilli annilaangagigukku napparsimmavimmi HIV-mut misissortissinnaavutit. Misissortinnissamut kialluunniit pinngitsaalisinnaanngilaatit, namminerluinnaq tamanna aalajangigassarivat, nalornerusunngikkuilli periarfissaq atorsinnaavat.
PDF-iliariukEmbed

Allaaserisaq nittartakkannut iliguk (Embed)

"HIV/AIDS". Allaaserisaq nittartakkannut script ataaniittoq kopiissuat taavalu inissisimaffissaanut nittartakkavit html´anut ikkullugu

Luk

Nassiuguk ikinngutinnut

Uunga e-mail

Atit

Nassiussaq

Luk

Kalerriut

Allataq

Email

Luk

Allaaserisaq pisartagarileruk

E-mailit

Luk