vælg et emne
... sammisaq toqqaruk

Hash - meeqqat inuusuttullu

PAASISSUTISSAT
Hash inerteqqutaavoq. Hashimik pinngitsuuisinnaajunnaarsinnaavutit, ikiaroorniaraannilu ikiaroorutissaq anneruleriartuinnartarpoq. Sapaatip akunnerini marluinnarni ullut tamaasa atuineq pinngitsuuisinnaajunnaarnissamut naammappoq. Ukiukitsuullutit hashitortaleruit pinngitsuuisinnaajunnaarsinnaanerit annertunerussaaq.
Hashimik aanngajaarneq taaneqakkajuttarpoq ”equnganeq”. Ikiaroornermut ersiutit takuneqarsinnaasut tassaapput isit aappillersimasut, qarnup parnunnera, tillernerup sukkanerunera, uummammik kassuttoorneq, arriitsuaqqamik oqalunneq aalaasaaseqarnerlu. Misigissutsit sakkortusisarput – soorlu nuannaarneq annilaanganerlu.

Annertuumik hashitortaruit qaratsat ataavartussamik innarlerneqarsinnaavoq. Pingaartumik ukiukitsuuguit.
• Hashi misissarissusermik millisitsisarpoq, sunniutaalu nal.ak. 24-ni atuussinnaasarpoq.
• Haship misigissuseqarneq sunnertarpaa, aallussisinnaaneq, eqqaamasinnaassuseq, ilikkagaqarsinnaassuseq aalaatsillu ataqatigiissaarsinnaanerat annikillisittarlugit.
• Hashi tassanngaannartumik annilaangalernermik uippakajaarnermillu misigititsilersinnaavoq – aammalu inuusuttuni sunnertiasuni tarnikkut nappaateqalernermik kinguneqarsinnaalluni.
• Hashimik pujortartarnerup timi innarlertarpaa. Naatsorsuutigineqarpoq marihuana-cigarettit pingasut-sisamat cigarettitut 20-tulli puannik ajoqusiitigisartut.
Piffissami sivisuumi hashimik pujortartartooreerluni taamaatikkaanni kingunerlutsitsisoqarsinnaavoq. Tassaasinnaapput sinnarliorneq, unnuami aallertarneq, arraqqajaaneq kajumissuseqannginnerlu.
Hashimik atornerluinerpit unitsinneratigut ilaatigut iluaqutissartarai eqqarsarlutit aallussisinnaanerulernerit, imminuinnaq eqqarsaatiginani allattaaq nukissaqarfigilernerat, sorusussuseqarnerulerneq, nuannaarnerulerneq, pitsaasunillu eqqarsarsinnaanerulerneq. Unitsitsinikkut iluaquterpassuit misigissavatit.

NEQEROORUT
Hashimik atornerluisuugut anigorusullugulu peqqinnissaqarfimmi sulisunut imaluunniit kommunimi isumaginninnermi sullissisumut saaffiginnissinnaavutit atornerluisuunermut katsorsarneqarnissat siunertaralugu.

MIO
www.mio.gl

1899 – SMS-ikkut siunnersorneqarneq
Ammasarfii: ataasinngornermiit tallimanngornermut nal. 16-18
Nuna tamakkerlugu Meeqqanut Inuusuttunullu SMS-ikkut attavissaq akeqanngitsoq – inersimasumik siunnersuisinnaasumik allaqateqarit.

NAMMINEQ QANOQ ILIUUSEQARSINNAAVUNA
Inersimasumik – toqqissisimaffigisannik – oqaloqateqarnissat pitsaasuuvoq. Taanna tassaasinnaavoq ilinniartitsisoq, perorsaasoq, anaanat, ataatat allaluunniit, ikiorneqarnissamik pisariaqartitsininni tapersersuisinnaasoq.

QANIGISAT
Meerara hashimik atornerluisuusoq pasitsaassimagukku ersiutit suut alaatsinaassavakka?
Malunnartorsuarmik, sakkortuumik tassanngaannartumillu meeqqavit pissusilersulernera hashimik atornerluisuunermut ilisarnaataasinnaavoq. Taamaattumik angajoqqaatut maluginiassavat meeqqat qanoq innersoq qanorlu pissusilersornersoq.
Ersiut ataasiinnaq ernumanissamut pissutissaqartitsinngilaq. Maluginiarulli ersiutit arlaqarnersut.

Ersiutit imaattut maluginiagassaraatit:

• Tassanngaannaq isummamik allanngortitsineq.
• Tassanngaannaq atuanngitsoortalerneq imaluunniit ilinniagasserinissamik soqutigisaarunneq. 
• Angerlarsimaffimmi atuarfimmiluunniit maleruagassanut tassanngaannaq akerliulerneq. 
• Nalinginnaanngitsumik kamarujussuartalerneq eqqissisimajunnaarnerlu.
• Angajoqqaanit ikinngutinilluunniit aningaasanik atorniakulajartorneq.
• Pigisat nassuiaatissartaqanngitsumik tammartalernerat. 
• Meeqqavit sumiissimanerminik pigisaminillu isertuussisalernera. 
• Takukulanngisassinnik meeqqassilu ilissinnut eqqartornikuunngisaannakkaminik ikinnguteqalernera.
• Meeqqavit tarnimigut nanertisimakulalernera.
• Meeqqavit qasusalernerujussua.
• Sinnarliortalernera eqqissisimaarsinnaajunnaarneralu.
• Hashimik hashimillu pujortarnermi atortunik nassaarussi.

Meeqqavit hashitortarnera pasitsaakkukku ernumanerit ersersissavat, naveersissanngilatilli. Tamatuma kinguneriinnassavaa meeqqavit suli pujortarnerulernera. Angajoqqaatut atuarfik imaluunniit angajoqqaat allat ikiortiserisinnaavatit, kisiannili meeqqavit sianiginngisaaniunngitsoq.
Pingaaruteqarpoq ilisimassallugu meeqqat inuusuttullu hashitortarnerat inuttut tarnikkullu ajornartorsiutinut aaqqiissuteqarfigineqartariaqartunut ersiutaakkajummat. Meeqqat inuusuttullu taakku ikiorneqarnissaat pingaaruteqarluinnarpoq. Kommunimi isumaginninnermi sullissisumik atuarfimmiluunniit ikiorteqarnissaq pisariaqakkajuppoq.
Ikiuinissami pitsaaliuinissamilu iliuutsit pingaarnerit ilagaat inuusuttut isumaqarluartumik suliffittaarnissaannut/ilinniagaqalernissaannut ikiornissaat, imaluunniit sulinerminnik ilinniarnerminnilluunniit attassiinnartinniarnissaat.

TV-kkut paasititsiniaaneq
Hashimik atornerluineq pillugu TV-kkut paasititsiniaaneq


SAAFFIGISASSAT
Peqqinnissaqarfimmi attavissat
 Kommunit attavigiuk
Katsorsaavik

PAASINIAAFFISSAT
http://stofinfo.sst.dk/Forsiden/Fakta_om_stoffer/Hash.aspx
www.CRF.AU.DK


PDF-iliariukEmbed

Allaaserisaq nittartakkannut iliguk (Embed)

"Hash - meeqqat inuusuttullu". Allaaserisaq nittartakkannut script ataaniittoq kopiissuat taavalu inissisimaffissaanut nittartakkavit html´anut ikkullugu

Luk

Nassiuguk ikinngutinnut

Uunga e-mail

Atit

Nassiussaq

Luk

Kalerriut

Allataq

Email

Luk

Allaaserisaq pisartagarileruk

E-mailit

Luk