vælg et emne
... sammisaq toqqaruk

Hash - naliginnaasumik innersuutit

Paasissutissat
Hashitortarneq Kalaallit Nunaanni siammaassimasorujussuuvoq, imigassamillu atornerluisuunermut ilaakkajuttarpoq.
Hashi inuit ilaannit oqaatigineqartartutut imigassamut taartaasuunngilaq akornusiisinnaanngitsoq.
Sivisuumik annertuumilluunniit hashimik atuineq imigassamik atuinerup taamaaqataanik inuttut aningaasaqarniarnermilu annertuunik kinguneqartarpoq.
Hashi uerinartuuvoq.
Hashimik akuttunngitsumik atuineq sianiillisitsisarpoq, arriillisitsilluni, soqutigisaarutsitsisarpoq eqqarsarluarsinnaajunnaarsitsisarlunilu.
Isummap sunnerneqarneratigut allannguuteqartitsisinnaavoq (psykose).
Sivisuumik atuinikkut piffissap qaninnerusup iluani eqqaamasinnaassuseq annikillisarpoq, taamaalillunilu ilikkagaqarsinnaaneq aamma.
Pinngitsuuisinnaajunnaarsinnaaneq imigassamik pinngitsuuisinnaajunnaarsinnaanermut naapertuuppoq. Ukiukitsuullutit pujortartaleruit pinngitsuuisinnaajunnaarsinnaanerit annertunerussaaq.
Piffissami sivisuumi hashimik pujortartartooreerluni taamaatikkaanni kingunerlutsitsisoqarsinnaavoq. Tassaasinnaapput sinnarliorneq, unnuami aallertarneq, arraqqajaaneq kajumissuseqannginnerlu.
Hashimik atornerluinerpit unitsinneratigut ilaatigut iluaqutissartarai eqqarsarlutit aallussisinnaanerulernerit, imminuinnaq eqqarsaatiginani allattaaq nukissaqarfigilernerat, sorusussuseqarnerulerneq, nuannaarnerulerneq pitsaasunillu eqqarsarsinnaanerulerneq.
Unitsitsinikkut iluaquterpassuit misigissavatit.


Neqeroorut
Hashimik atornerluisuuguit nammineerlutit anigorsinnaanngisannik, atornerluisuunermut katsorsartikkumalluni peqqinnissaqarfiup imaluunniit kommunimi isumaginninnermi sullissisup saaffiginissaanut periarfissaqarputit.


Nammineq qanoq iliuuseqarsinnaavunga?
Hashimik atornerluisuunerit anigorusullugu aalajangersimaguit pingaaruteqarpoq kingunerlutsitsinerup ersiutai nalaassinnaasatit, qanorlu sivisutiginnissaasa naatsorsuutigisinnaanerat ilisimassallugit.

Naatsorsuutigisinnaavat:
• Immaqa arrajanerulissallutit. Sapaatip akunnerata ataatsip marlulluunniit ingerlaneranni imaassinnaavoq kamajasuunngortutit suunngitsunnguillu puffassutigisalerlugit. Tamatuma kingorna arraqqajaaneq annikilliartortarpoq
• Annilaangaqqajaanerulersinnaavutit. Nalinginnaavoq annilaangaqqajaanerup ullut marlussuit ingerlaneranni takkuttarnera, qaammatillu siulliup ingerlanerani tammaqqittarpoq
• Imaassinnaavoq ulloq siulleq unitsitsiffigisat aallarnerfigalugu sinnarliulersutit. Sinittarnerilli ullormiit ullormut pitsanngoriartussaaq hashimik suli pujortaqqinngikkuit
• Unitsitsininniit ullualunni nerisassat kajumigiunnaarsinnaavatit. Tamanna qaangiutipallattarpoq
• Timivit eqqissiviilliornera eqqarsaaterpassuaqarnerlu misigisinnaassavatit. Eqqissiviilliorneq qaammatip siulliup ingerlanerani qaangiuttarpoq
• Ulloqarsinnaavutit niaqunngullutit, naarlullutit saannerillutillu
• Sapaatip akunnerata siulliup ingerlanerani ulloqarsinnaavutit nikallungallutit
• Aamma ilarpassui sapaatip akunnerata ataatsip marlulluunniit ingerlanerani sakkortoorsuarnik piviusorpalaartunillu sinnattortaleriataartarput, unnuamilu ullaakkulluunniit itertassaatit eqqissiveqanngitsutut misigisimallutit.

Ikittoralaarsuaannaat ersiutit tamakku tamaasa misigisarpaat, aamma assigiinngitsunik sivisussuseqartarput.
Hashimik atuinerpit unitsinneraniit ullut siulliit ingerlaneranni kingunerlutsitsinerit arlallit misigisassavatit. Manngertisimaannarilli – ullummi qulit missaasa ingerlaneranni pitsaanerulersarpoq.
Ullut 30-t qaangiunneranni kingunerlutsitsinerit nalinginnaasumik qaangiuttarput.
Kialuunniit 100%-imik qulakkeerlugu oqaatigisinnaanngilaa illit qanoq issanersutit.
Tarnikkut timikkullu ajorluinnaruit ilisimasalimmik oqaloqateqartariaqarputit, soorlu nakorsamik imaluunniit peqqinnissaqarfimmi sulisumik allamik.

Kingunerlutsitsinerit annikillisarniarlugit qanoq iliorsinnaavunga?
• Timit aalatittaruk qasulersillugu
• Qanoq innerit pillugu oqaloqateqarit
• Peqqinnartunik nerisarit malugalugulu ullut tamaasa nukittoriartorlutit
• Ullut tamaasa piffissami aalajangersimasumi innartarit makittarlutillu. Innarnissat sioqqullugu nal.ak. ataaseq kingulleq fjernsynernaveersaartarit, computerilerisarnak assigisaannilluunniit sammisaqartarnak, taamaaliorsinnaaguit
• Nuannarisannik nakerisannilluunniit iliuuseqartarit
• Najugaqateqaruit piffissaq imaannaanngitsoq atortussaallugu piareersarukkit pitsaasuussaaq, pisariaqarfiatigullu kisimiinnissamut periarfissaqarnissat isumagiuk.


Qanigisat
Atornerluisuuneq atornerluisuusup kisimi ajornartorsiutiginngilaa, atornerluinerulli ilaqutariit, pingaartumillu meeqqat sunnertarpai.
Qanigisat atornerluisuusumit namminermit atornerluinermit sunnerneqakkajunnerusarput, taamaattumillu ajornartorsiutip aaqqinneqarnissaa piumasaralugu akuliunnissamut pisinnaatitaaffeqarputit.
Atornerluisumut qanigisaasuutut ilaquttatit ilagalugit ilaqutariittut katsorsartinnissamut peqataasinnaavutit Katsorsaavimmi ima taaguutilimmi ”Periarfissaqartillutit inuunerit atoruk”.
Katsorsaanermi taaguutilimmi ”Periarfissaqartillutit inuunerit atoruk” inuttut ineriartorneq ilaavoq, illit ilaquttavillu nammineq nukittuffigisassi paasisimanerulernissaannut inuttullu ilaqutariittullu naleqartitassi pingaartinnerulernissaannut periarfissinneqarfigisassarsi.
Katsorsartikkumallusi kommuninni isumaginninnermi sullissisoq saaffigissavat.

Qanigisatut atornerluisuusup hashitortarnerminik unitsitsinermi sunik kingunerlutsitsisinnaanera ilisimassallugu pingaaruteqarpoq.
Tamatumuunakkut tapersersorlugulu paasilluarsinnaanerussavat.
• Kingunerlutsitsisoq kingunerlutsitsinerani paasilluarlugu ersersiguk
• Inissaqartiguk
• Tusarnaarluartaruk
• Hashimik atuinerminik unitsitsinermi aalajangiusimaannarnissaanut kaammattoruk, naak tamanna tassunga ajornakusoorsinnaagaluartoq.


Saaffigisassat
Peqqinnissaqarfimmi attavissat
 Kommunit attavigiuk


TV-kkut paasititsiniaaneq
Hashimik atornerluineq pillugu TV-kkut paasititsiniaaneq

Iserfissaqqissut
http://stofinfo.sst.dk/Forsiden/Fakta_om_stoffer/Hash.aspx
www.CRF.AU.DK
http://psy.au.dk/fileadmin/site_files/filer_rusmiddelforskning/dokumenter/redskaber/HASHFOLDERprint.pdf 

 

PDF-iliariukEmbed

Allaaserisaq nittartakkannut iliguk (Embed)

"Hash - naliginnaasumik innersuutit". Allaaserisaq nittartakkannut script ataaniittoq kopiissuat taavalu inissisimaffissaanut nittartakkavit html´anut ikkullugu

Luk

Nassiuguk ikinngutinnut

Uunga e-mail

Atit

Nassiussaq

Luk

Kalerriut

Allataq

Email

Luk

Allaaserisaq pisartagarileruk

E-mailit

Luk